എഐസിസി ജനറൽ സെക്രട്ടറി കെ.സി. വേണുഗോപാലിനെതിരെ സമൂഹമാധ്യമങ്ങളിലൂടെ തുടർച്ചയായി സൈബർ ആക്രമണം നടത്തിയ സംഭവത്തിൽ അഞ്ച് കോൺഗ്രസ് അനുഭാവികൾക്കെതിരെ പൊലീസ് കേസെടുത്തു. ആലപ്പുഴ സൈബർ ക്രൈം പൊലീസാണ് ജാമ്യമില്ലാ വകുപ്പുകൾ ഉൾപ്പെടെ ചുമത്തി കേസന്വേഷണം ആരംഭിച്ചിരിക്കുന്നത്.
നിയമസഭാ തെരഞ്ഞെടുപ്പ് വിജയത്തിന് ശേഷമുണ്ടായ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കങ്ങളുടെ സമയത്താണ് കെ.സി. വേണുഗോപാലിനെതിരെ സോഷ്യൽ മീഡിയയിലൂടെ വലിയ രീതിയിൽ അധിക്ഷേപങ്ങളും ആസൂത്രിത സൈബർ ആക്രമണങ്ങളും അരങ്ങേറിയത്. കോൺഗ്രസ് നേതാവ് ജോൺസൺ എബ്രഹാം നൽകിയ പരാതിയിലാണ് ഈ നടപടി.
പ്രതികളായ അഞ്ച് പേരുടെയും സോഷ്യൽ മീഡിയ അക്കൗണ്ടുകൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്. പ്രതികളിൽ ചിലരുടെ പ്രൊഫൈൽ ചിത്രങ്ങൾ മുഖ്യമന്ത്രിയടക്കമുള്ള മറ്റ് പ്രമുഖ നേതാക്കൾക്കൊപ്പമുള്ളതാണെന്നതും ശ്രദ്ധേയമാണ്. ഡിജിപിക്ക് പരാതി നൽകി മാസങ്ങൾ കഴിഞ്ഞിട്ടും നടപടി വൈകിയതിനെ തുടർന്ന് ആഭ്യന്തരമന്ത്രിക്ക് വീണ്ടും നിവേദനം നൽകിയതോടെയാണ് അന്വേഷണം ഊർജിതമാക്കാൻ സൈബർ വിഭാഗം ഐജിക്ക് നിർദ്ദേശം ലഭിച്ചത്.
അതേസമയം, തനിക്കെതിരെ സൈബർ ആക്രമണം നടത്തിയ ആർക്കെതിരെയും കേസ് എടുക്കരുതെന്നാണ് വ്യക്തിപരമായ തന്റെ നിലപാടെങ്കിലും, സ്വന്തം നേതാക്കളെ സൈബറിടത്തിൽ അപമാനിക്കുന്നവർ ആത്മപരിശോധന നടത്തണമെന്ന് കെ.സി. വേണുഗോപാൽ പ്രതികരിച്ചു. എഫ്.ഐ.ആർ രജിസ്റ്റർ ചെയ്ത സാഹചര്യത്തിൽ പൊലീസ് പരാതിക്കാരന്റെ മൊഴി രേഖപ്പെടുത്തുകയും കൂടുതൽ അന്വേഷണത്തിലേക്ക് കടക്കുകയും ചെയ്തിട്ടുണ്ട്.
