കർണാടകയിലെ ആശാപ്രവർത്തകർ തങ്ങളുടെ അടിസ്ഥാന അവകാശങ്ങൾക്കായി തലസ്ഥാനമായ ബെംഗളൂരുവിലെ ഫ്രീഡം പാർക്കിൽ ആരംഭിച്ച അനിശ്ചിതകാല രാപ്പകൽ സമരം ഇന്ന് മൂന്നാം ദിവസത്തിലേക്ക് കടന്നു. സംസ്ഥാനത്തിന്റെ വിവിധ ജില്ലകളിൽ നിന്നായി ആയിരക്കണക്കിന് വനിതാ പ്രവർത്തകരാണ് കൊടുംതണുപ്പിനെപ്പോലും അവഗണിച്ച് തെരുവിൽ തമ്പടിച്ച് പ്രതിഷേധിക്കുന്നത്. പ്രതിമാസ ഓണറേറിയം 15,000 രൂപയായി വർദ്ധിപ്പിക്കുക എന്നതാണ് ഇവരുടെ പ്രധാന ആവശ്യം. മുൻപ് നടത്തിയ സമരത്തെത്തുടർന്ന് പ്രതിമാസം 10,000 രൂപ നൽകാമെന്ന് സർക്കാർ ഉറപ്പ് നൽകിയിരുന്നെങ്കിലും അത് പാലിക്കപ്പെട്ടില്ലെന്ന് അസോസിയേഷൻ സംസ്ഥാന സെക്രട്ടറി ഡി. നാഗലക്ഷ്മി ചൂണ്ടിക്കാട്ടി.
കഴിഞ്ഞ ചൊവ്വാഴ്ച ആരംഭിച്ച പ്രക്ഷോഭം ഇന്നലെ കൂടുതൽ ശക്തമായതോടെ ഫ്രീഡം പാർക്കിന് സമീപമുള്ള റോഡുകളിലേക്കും സമരക്കാർ വ്യാപിക്കുകയും നഗരത്തിൽ ഗതാഗത നിയന്ത്രണം ഏർപ്പെടുത്തുകയും ചെയ്തു. എട്ട് പ്രധാന ആവശ്യങ്ങളാണ് സമരസമിതി മുന്നോട്ടുവെക്കുന്നത്. മൊബൈൽ ഫോണോ മതിയായ ആനുകൂല്യങ്ങളോ നൽകാതെ ‘സമസ്ത’ (Samasta) ആപ്പ് വഴിയുള്ള നിർബന്ധിത ഡിജിറ്റൽ ജോലികൾ അടിച്ചേൽപ്പിക്കുന്നത് അവസാനിപ്പിക്കുക, വിരമിച്ചവർക്കുള്ള കുടിശ്ശിക തുക ഉടൻ വിതരണം ചെയ്യുക, കേന്ദ്ര ഇൻസെന്റീവുകൾ കൃത്യമായി നൽകുക എന്നിവ ഇതിൽ ഉൾപ്പെടുന്നു. കൂടാതെ, പശ്ചിമ ബംഗാൾ മാതൃകയിൽ അഞ്ച് ലക്ഷം രൂപ വിരമിക്കൽ ആനുകൂല്യമായി അനുവദിക്കണമെന്നും ഗുരുതരമായ രോഗങ്ങൾക്ക് ചികിത്സയിലിരിക്കുമ്പോൾ മൂന്ന് മാസത്തെ വേതനവും ഇൻസെന്റീവും നൽകണമെന്നും പ്രവർത്തകർ ആവശ്യപ്പെടുന്നു.
18 വർഷത്തിലേറെയായി ഗ്രാമപ്രദേശങ്ങളിലും നഗരങ്ങളിലെ ചേരികളിലും ആരോഗ്യരംഗത്ത് നിസ്വാർത്ഥ സേവനം ചെയ്യുന്ന തങ്ങളെ സർക്കാർ അവഗണിക്കുകയാണെന്ന് സമരക്കാർ ആരോപിക്കുന്നു. മുൻപ് പിരിച്ചുവിട്ട ആശാ ഫെസിലിറ്റേറ്റർമാരെ തിരിച്ചെടുക്കുക, എൻ.ഐ.ഒ.എസ് (NIOS) പരിശീലനം പൂർത്തിയാക്കിയവർക്ക് 5,000 രൂപ പ്രത്യേക ഇൻസെന്റീവ് നൽകുക തുടങ്ങിയ ആവശ്യങ്ങളും ഇവർ ഉന്നയിച്ചിട്ടുണ്ട്. ഉഗ്ര നരസിംഹ ഗൗഡ, പ്രൊഫ. കാശിനാഥ് അംബലഗി, ഡോ. സുധ കാമത്ത് തുടങ്ങിയ പ്രമുഖ സാമൂഹിക പ്രവർത്തകരും എഴുത്തുകാരും സമരത്തിന് ഐക്യദാർഢ്യം പ്രഖ്യാപിച്ച് രംഗത്തെത്തി. ആവശ്യങ്ങൾ അംഗീകരിച്ച് സർക്കാർ രേഖാമൂലം ഉറപ്പ് നൽകുന്നതുവരെ സമരവേദിയിൽ നിന്ന് പിന്മാറില്ലെന്ന ഉറച്ച തീരുമാനത്തിലാണ് ആശാപ്രവർത്തകർ.