കേരള സർവകലാശാലയുടെ കാര്യവട്ടം ക്യാമ്പസിലെ വനിതാ ഹോസ്റ്റലുകൾക്ക് പിന്നിൽ കുന്നുകൂടിക്കിടക്കുന്ന മാലിന്യക്കൂമ്പാരവും വെള്ളക്കെട്ടും ഡെങ്കിപ്പനി വ്യാപനത്തിന് വഴിയൊരുക്കുന്നു. ഒരാഴ്ചയ്ക്കിടെ പത്ത് വിദ്യാർഥിനികൾക്കും മൂന്ന് സർവകലാശാലാ ജീവനക്കാർക്കും ഉൾപ്പെടെ 13 പേർക്ക് രോഗം സ്ഥിരീകരിച്ചതോടെ ക്യാമ്പസും ഹോസ്റ്റലും മൂന്ന് ദിവസത്തേക്ക് അടച്ചിട്ടിരിക്കുകയാണ്. ചൊവ്വാഴ്ച മുതൽ ആരംഭിച്ച അടച്ചിടൽ നിലനിൽക്കുന്നതിനാൽ ഇന്നും ക്ലാസുകൾ പൂർണമായും ഓൺലൈൻ വഴിയാണ് നടക്കുന്നത്. ഹോസ്റ്റൽ പരിസരത്ത് മഴവെള്ളം കെട്ടിനിൽക്കുന്നതും കാടുമൂടിക്കിടക്കുന്നതും മാലിന്യങ്ങൾ യഥാസമയം നീക്കം ചെയ്യാത്തതുമാണ് കൊതുകുകൾ പെരുകാനും രോഗം പടരാനും കാരണമായതെന്ന് വിദ്യാർഥികളും രക്ഷിതാക്കളും ചൂണ്ടിക്കാട്ടുന്നു.
നൂറിലധികം വിദ്യാർഥികൾ നിലവിൽ പനിലക്ഷണങ്ങളോടെ പരിശോധനാഫലം കാത്തിരിക്കുന്നതിനാൽ ക്യാമ്പസിലാകെ കടുത്ത ആശങ്കയാണ് നിലനിൽക്കുന്നത്. അവധിക്ക് നാട്ടിലേക്ക് മടങ്ങിയ പല വിദ്യാർഥിനികൾക്കും പനി ബാധിച്ചതായുള്ള വിവരങ്ങളും പുറത്തുവരുന്നുണ്ട്. കഴിഞ്ഞ എട്ടിന് മൂന്ന് വിദ്യാർഥികൾക്ക് രോഗം സ്ഥിരീകരിച്ചിരുന്നെങ്കിലും, അന്ന് തന്നെ ഫലപ്രദമായ ശുചീകരണ നടപടികൾ സ്വീകരിക്കുന്നതിൽ സർവകലാശാലാ അധികൃതരും നഗരസഭയും വീഴ്ച വരുത്തിയെന്നാണ് ഉയരുന്ന പ്രധാന ആക്ഷേപം. തിങ്കളാഴ്ച ചേർന്ന സിൻഡിക്കേറ്റ് യോഗത്തിൽ ആരോഗ്യവകുപ്പ് ഉദ്യോഗസ്ഥരുമായി നടത്തിയ ചർച്ചയ്ക്ക് ശേഷമാണ് അടിയന്തരമായി ഹോസ്റ്റൽ ഒഴിപ്പിക്കാനും ക്യാമ്പസ് അടച്ചിടാനും തീരുമാനമായത്.
രോഗബാധിതരായ വിദ്യാർഥികളെയും ജീവനക്കാരെയും വീടുകളിലേക്ക് അയച്ചതിന് പിന്നാലെ ആരോഗ്യവകുപ്പിന്റെ നേതൃത്വത്തിൽ ക്യാമ്പസിൽ ഫോഗിംഗും ഉറവിട നശീകരണ പ്രവർത്തനങ്ങളും ഊർജിതമാക്കിയിട്ടുണ്ട്. എന്നാൽ, ഹോസ്റ്റലുകൾക്ക് പിന്നിലെ മാലിന്യപ്രശ്നത്തിന് ശാശ്വത പരിഹാരം കാണാതെ ക്യാമ്പസ് വീണ്ടും തുറക്കുന്നത് കൂടുതൽ അപകടകരമാകുമെന്ന നിലപാടിലാണ് വിദ്യാർഥി സംഘടനകളും രക്ഷിതാക്കളും. രോഗവ്യാപനം പൂർണമായും നിയന്ത്രണവിധേയമാക്കാൻ ശുചീകരണ പ്രവർത്തനങ്ങൾ വേഗത്തിലാക്കണമെന്നും ആരോഗ്യസുരക്ഷ ഉറപ്പാക്കണമെന്നും ആവശ്യം ശക്തമാവുകയാണ്.