പേരാമ്പ്ര ഗ്രാമപഞ്ചായത്തിലെ വിവിധ ഭാഗങ്ങളിൽ മഞ്ഞപ്പിത്തം പടർന്നുപിടിക്കുന്നത് പ്രദേശവാസികളിൽ കടുത്ത ആശങ്കയുണ്ടാക്കുന്നു. പഞ്ചായത്തിലെ 15, 16 വാർഡുകളിൽ ഉൾപ്പെടുന്ന കിഴിഞ്ഞാണ്യം കുറക്കൻകുന്ന് മേഖലയിലാണ് രോഗവ്യാപനം രൂക്ഷമായിരിക്കുന്നത്. ഇതുവരെ ഇരുപത്തിയൊന്ന് പേർക്ക് രോഗം സ്ഥിരീകരിച്ചതായാണ് ആരോഗ്യവകുപ്പ് പുറത്തുവിടുന്ന ഏറ്റവും പുതിയ വിവരം. രണ്ടു ദിവസം മുൻപ് പുറത്തുവന്ന റിപ്പോർട്ടുകൾ പ്രകാരം സമീപദിവസങ്ങളിൽ വയനാട്ടിലേക്ക് യാത്ര പോയി തിരിച്ചെത്തിയവരിലാണ് ആദ്യമായി രോഗലക്ഷണങ്ങൾ കണ്ടെത്തിയത്. തുടർന്ന് ഇവരുമായി അടുത്ത സമ്പർക്കം പുലർത്തിയവരിലൂടെ രോഗം കൂടുതൽ പേരിലേക്ക് പകരുകയായിരുന്നുവെന്നാണ് ആരോഗ്യവകുപ്പിന്റെ പ്രാഥമിക നിഗമനം.
നിലവിൽ പേരാമ്പ്ര ഹയർ സെക്കൻഡറി സ്കൂളിൽ പേരാമ്പ്ര ഉപജില്ലാ സ്കൂൾ കലോത്സവം നടന്നുവരുന്ന സാഹചര്യത്തിൽ ആരോഗ്യവകുപ്പ് പ്രദേശത്ത് അതീവ ജാഗ്രത പ്രഖ്യാപിച്ചിട്ടുണ്ട്. കലോത്സവ നഗരിയിലും പരിസര പ്രദേശങ്ങളിലും ഭക്ഷണശാലകളിലും ആരോഗ്യവകുപ്പ് ഉദ്യോഗസ്ഥർ കർശന പരിശോധനകളും പ്രതിരോധ പ്രവർത്തനങ്ങളും ഊർജ്ജിതമാക്കി. രോഗവ്യാപനം തടയുന്നതിന്റെ ഭാഗമായി പ്രദേശത്തെ കിണറുകളിലും മറ്റ് പൊതുജലസ്രോതസ്സുകളിലും ക്ലോറിനേഷൻ നടപടികൾ നടന്നുവരികയാണ്.
പൊതുജനങ്ങൾ ജാഗ്രത പാലിക്കണമെന്നും തിളപ്പിച്ചാറിയ വെള്ളം മാത്രം കുടിക്കാൻ ഉപയോഗിക്കണമെന്നും അധികൃതർ കർശന നിർദേശം നൽകിയിട്ടുണ്ട്. തുറന്നുവെച്ച ഭക്ഷണപദാർത്ഥങ്ങളും വൃത്തിഹീനമായ സാഹചര്യത്തിൽ തയ്യാറാക്കുന്ന ശീതളപാനീയങ്ങളും പൂർണ്ണമായും ഒഴിവാക്കണം. വീടുകളും പരിസരവും എപ്പോഴും ശുചിയായി സൂക്ഷിക്കണമെന്നും ആരോഗ്യവകുപ്പ് ഓർമ്മിപ്പിക്കുന്നു.
കടുത്ത പനി, കണ്ണുകളിലും മൂത്രത്തിലും മഞ്ഞനിറം, കടുത്ത ക്ഷീണം, ഛർദ്ദി, വിശപ്പില്ലായ്മ തുടങ്ങിയ രോഗലക്ഷണങ്ങൾ അനുഭവപ്പെടുന്നവർ യാതൊരു കാരണവശാലും അവ അവഗണിക്കരുതെന്ന് ആരോഗ്യവകുപ്പ് മുന്നറിയിപ്പ് നൽകുന്നു. രോഗലക്ഷണങ്ങൾ കണ്ടാലുടൻ സ്വയം ചികിത്സയ്ക്ക് മുതിരാതെ അടുത്തുള്ള സർക്കാർ ആരോഗ്യകേന്ദ്രത്തിൽ എത്തി വിദഗ്ധ ചികിത്സ തേടേണ്ടതാണ്. ഗ്രാമപഞ്ചായത്തിന്റെയും ആരോഗ്യവകുപ്പിന്റെയും നേതൃത്വത്തിൽ പ്രദേശത്ത് ബോധവൽക്കരണ പ്രവർത്തനങ്ങളും നിരീക്ഷണവും ശക്തമായി തുടരുകയാണ്.
