ബിഎൽഎം (BLM) കോഓപ്പറേറ്റീവ് സൊസൈറ്റി സാമ്പത്തിക തിരിമറി കേസിൽ സ്ഥാപക ചെയർമാൻ ആർ. പ്രേംകുമാറിനായി ക്രൈംബ്രാഞ്ചും എൻഫോഴ്‌സ്‌മെന്റ് ഡയറക്ടറേറ്റും (ഇഡി) തെരച്ചിൽ ഊർജിതമാക്കി. നിയമപരമായ വഴികൾ പൂർണ്ണമായി തെളിഞ്ഞതോടെ ഇയാൾ വിദേശത്തേക്ക് കടക്കാൻ സാധ്യതയുണ്ടെന്ന സംശയത്തിലാണ് അന്വേഷണ ഏജൻസികൾ. പ്രേംകുമാറിനെ ചോദ്യം ചെയ്യാനായി വീണ്ടും ഹാജരാകാൻ ഇഡി നോട്ടീസ് അയച്ചിട്ടുണ്ടെങ്കിലും ഇയാൾ ഒളിവിലാണെന്നാണ് വിവരം. വരുംദിവസങ്ങളിൽ ലുക്കൗട്ട് നോട്ടീസ് പുറപ്പെടുവിച്ച് വിമാനത്താവളങ്ങൾ കേന്ദ്രീകരിച്ച് പരിശോധന ശക്തമാക്കും.
കോഴിക്കോട് നടക്കാവ് പൊലീസ് രജിസ്റ്റർ ചെയ്ത സാമ്പത്തിക തട്ടിപ്പ് കേസിൽ ആർ. പ്രേംകുമാറിനെ അറസ്റ്റ് ചെയ്യാൻ മുൻകൂർ നോട്ടീസ് നൽകേണ്ടതില്ലെന്ന് ഹൈക്കോടതി വ്യക്തമാക്കുകയും, തുടർന്ന് കോഴിക്കോട് മജിസ്‌ട്രേറ്റ് കോടതി അറസ്റ്റിന് അനുമതി നൽകുകയും ചെയ്തിരുന്നു. കോടതി ഉത്തരവിന് പിന്നാലെ തിരുവനന്തപുരത്തെയും ചെന്നൈയിലെയും പോണ്ടിച്ചേരിയിലെയും കേന്ദ്രങ്ങൾ ലക്ഷ്യമിട്ട് ക്രൈംബ്രാഞ്ച് തെരച്ചിൽ ആരംഭിച്ചെങ്കിലും പ്രേംകുമാറിനെ കണ്ടെത്താനായിട്ടില്ല.
അതിനിടെ കേസിൽ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) സാമ്പത്തിക ക്രമക്കേടുകൾ കേന്ദ്രീകരിച്ച് അന്വേഷണം കൂടുതൽ കടുപ്പിച്ചു. റോൾസ് റോയ്‌സ്, പോർഷെ ഉൾപ്പെടെയുള്ള ആഡംബര വാഹനങ്ങളും ബാങ്ക് നിക്ഷേപങ്ങളും സ്വർണാഭരണങ്ങളും അടക്കം 103 കോടി രൂപ മൂല്യം വരുന്ന സ്വത്തുക്കളാണ് ഇഡി മരവിപ്പിച്ചത്. 320-ലേറെ അക്കൗണ്ടുകൾ വഴിയാണ് നിക്ഷേപ തുക കുടുംബാംഗങ്ങളുടെ പേരിലേക്ക് വകമാറ്റിയതെന്ന് കണ്ടെത്തിയിരുന്നു. ബിഎൽഎമ്മിന്റെ പേരിൽ നിക്ഷേപകരിൽ നിന്ന് സ്വീകരിച്ച തുക ഉപയോഗിച്ച് റിയൽ എസ്റ്റേറ്റ് മേഖലയിലും ആഡംബര ഹോട്ടലുകളിലും നിക്ഷേപം നടത്തിയതായും കണ്ടെത്തിയിട്ടുണ്ട്. കേസിൽ തൊട്ടടുത്ത ദിവസങ്ങളിൽ തന്നെ നിർണായക നീക്കങ്ങൾ ഉണ്ടാകുമെന്നാണ് കരുതുന്നത്.
