കേരള എക്സൈസ് വകുപ്പിൽ വൻ രാഷ്ട്രീയ-ഭരണപരമായ കൊടുങ്കാറ്റ് ഉയർത്തിയ ബാർ ലൈസൻസ് വിവാദത്തിൽ നിർണായക നീക്കം. മുൻ എക്സൈസ് കമ്മിഷണർ സീറാം സാംബശിവ റാവുവിന്റെ കാലയളവിൽ നടന്ന മുഴുവൻ ബാർ ലൈസൻസ് അനുമതികളിലും ഇടപാടുകളിലും വിജിലൻസ് അന്വേഷണം ആവശ്യപ്പെട്ട് എക്സൈസ് മന്ത്രി എം. ലിജു മുഖ്യമന്ത്രിക്ക് ഫയൽ കൈമാറി.
സർക്കാർ അറിയാതെയും എക്സൈസ് നയങ്ങൾക്ക് വിരുദ്ധമായും ബാർ ലൈസൻസുകൾ പുതുക്കി നൽകിയതും പുതിയ അനുമതികൾ അനുവദിച്ചതുമാണ് വിവാദങ്ങൾക്ക് തുടക്കമിട്ടത്. നെടുമ്പാശ്ശേരി സിയാൽ (CIAL) വിമാനത്താവളത്തിൽ സർക്കാരിന്റെയും മന്ത്രിയുടെയും മുൻകൂർ അനുമതിയില്ലാതെ രണ്ട് ബാറുകൾക്ക് ലൈസൻസ് നൽകിയതും മൂന്നാമതൊരു ലൈസൻസിന് അനുമതി നൽകിയതും വിജിലൻസ് സംഘം പ്രത്യേകം പരിശോധിക്കും. കൂടാതെ ബേക്കറികൾ വഴി ഹോർട്ടി വൈൻ വിൽക്കാൻ അനുമതി നൽകിയതുമായി ബന്ധപ്പെട്ട ഫയലുകളും എക്സൈസ് വകുപ്പ് അന്വേഷണത്തിനായി സമർപ്പിച്ചിട്ടുണ്ട്.
എക്സൈസ് കമ്മിഷണർ സ്ഥാനത്തുനിന്ന് നീക്കുന്നതിന് തൊട്ടുമുമ്പ്, വകുപ്പിലെ ചില ഉന്നത ഉദ്യോഗസ്ഥർക്ക് ബാർ ഉടമകളുമായി വഴിവിട്ട പണമിടപാടുകളുണ്ടെന്ന് ആരോപിച്ച് സാംബശിവ റാവു അഡീഷണൽ ചീഫ് സെക്രട്ടറിക്ക് കത്ത് നൽകിയിരുന്നു. എന്നാൽ, കോഴ ഇടപാടുകൾ നടന്നിട്ടുണ്ടെങ്കിൽ അത് നേരത്തെ സർക്കാരിന്റെ ശ്രദ്ധയിൽപ്പെടുത്താതെ സ്ഥാനചലനം ഉണ്ടാകുന്നതുവരെ മറച്ചുവെച്ചത് ഗുരുതര വീഴ്ചയാണെന്നാണ് സർക്കാരിന്റെ വിലയിരുത്തൽ. സാംബശിവ റാവു സമർപ്പിച്ച റിപ്പോർട്ടിലെ ആരോപണങ്ങളും അദ്ദേഹത്തിന്റെ കാലത്ത് നടന്ന നടപടികളും ഒരുപോലെ അന്വേഷണ പരിധിയിൽ ഉൾപ്പെടുത്താനാണ് വകുപ്പിന്റെ തീരുമാനം.
വിവാദത്തിൽ ഉന്നത ഐ.എ.എസ് ഉദ്യോഗസ്ഥനും എക്സൈസ് ഡെപ്യൂട്ടി കമ്മിഷണർമാരും സംശയനിഴലിലാണ്. ഐ.എ.എസ് ഉദ്യോഗസ്ഥർക്കെതിരെ പ്രാഥമിക അന്വേഷണം നടത്തുന്നതിന് സർക്കാരിന്റെ മുൻകൂർ അനുമതി ആവശ്യമായതിനാലാണ് ഫയൽ ആഭ്യന്തര വകുപ്പിലൂടെ മുഖ്യമന്ത്രിയുടെ പരിഗണനയ്ക്ക് അയച്ചിരിക്കുന്നത്. മുഖ്യമന്ത്രി ഫയൽ അംഗീകരിക്കുന്നതോടെ വിജിലൻസ് ഔദ്യോഗികമായി അന്വേഷണത്തിലേക്ക് കടക്കും. ഇതിനിടെ, സ്ഥലംമാറ്റ പട്ടിക തയാറാക്കിയതുമായി ബന്ധപ്പെട്ട് സീറാം സാംബശിവ റാവു ഭീഷണിപ്പെടുത്തിയെന്ന പരാതിയുമായി എക്സൈസ് ഇൻസ്പെക്ടർ രംഗത്തെത്തിയത് ഉദ്യോഗസ്ഥ തലത്തിലുള്ള ഭിന്നത വീണ്ടും മറനീക്കി പുറത്തുകൊണ്ടുവന്നിട്ടുണ്ട്.
