അടൂർ പൊലീസ് സ്റ്റേഷനിൽ അതിക്രമിച്ചു കയറി സംഘർഷമുണ്ടാക്കിയ സംഭവത്തിൽ പത്തനംതിട്ട ജില്ലാ പഞ്ചായത്ത് അംഗവും കോൺഗ്രസ് നേതാവുമായ ശ്രീനാദേവി കുഞ്ഞമ്മയെ കേസിലെ പ്രതിയായി പൊലീസ് ഉൾപ്പെടുത്തി. അതിക്രമിച്ചു കയറുന്നത് ഉൾപ്പെടെയുള്ള വകുപ്പുകൾ ചുമത്തിയാണ് (ഭാരതീയ ന്യായ സംഹിത 333-ാം വകുപ്പ് ഉൾപ്പെടെ) പൊലീസ് പുതിയ നടപടി സ്വീകരിച്ചിരിക്കുന്നത്. ഇന്നലെ രാത്രിയോടെയാണ് ശ്രീനാദേവി കുഞ്ഞമ്മയ്ക്കെതിരെ ശക്തമായ വകുപ്പുകൾ ചുമത്തി കേസിൽ പ്രതിയാക്കാൻ പൊലീസ് തീരുമാനിച്ചത്.
ശ്രീനാദേവി കുഞ്ഞമ്മയ്ക്ക് പുറമെ യൂത്ത് കോൺഗ്രസ് നേതാക്കളായ ഫെന്നി നൈനാൻ, അബിൻ ശിവദാസ്, നെസ്മൽ തുടങ്ങിയ മറ്റു പ്രവർത്തകരെയും കേസിൽ പ്രതി ചേർത്തിട്ടുണ്ട്. കേസ് സംബന്ധിച്ച കൂടുതൽ വിശദാംശങ്ങൾ വ്യക്തമാക്കുന്ന റിപ്പോർട്ട് പൊലീസ് ഉടൻ കോടതിയിൽ സമർപ്പിക്കും. കഴിഞ്ഞ ജൂലൈ 11-നായിരുന്നു കേസിനാസ്പദമായ സംഭവം നടന്നത്. ശ്രീനാദേവിയുടെ പരാതിയിൽ യൂട്യൂബറായ രാജൻ ജോസഫിനെ അറസ്റ്റ് ചെയ്ത് സ്റ്റേഷനിലേക്ക് കൊണ്ടുവന്ന സമയത്ത്, കോൺഗ്രസ് പ്രവർത്തകർ സ്റ്റേഷനിൽ അതിക്രമിച്ചു കയറുകയും സംഘർഷ അന്തരീക്ഷം സൃഷ്ടിക്കുകയുമായിരുന്നു. സംഭവത്തിനിടെ ചില പൊലീസുകാർക്ക് പരിക്കേൽക്കുകയും ചെയ്തിരുന്നു.
എന്നാൽ, മാസങ്ങൾ പിന്നിട്ടിട്ടും എഫ്.ഐ.ആറിൽ കണ്ടാലറിയാവുന്ന പ്രതികൾ എന്ന് മാത്രമായിരുന്നു രേഖപ്പെടുത്തിയിരുന്നത്. തുടർന്ന് സ്റ്റേഷനിലെ സിസിടിവി ദൃശ്യങ്ങൾ പൂര്ണ്ണമായി പുറത്തുവരുകയും വാർത്തയായതിനെ തുടർന്നും കേസിൽ കർശന നടപടിയുണ്ടാകുമെന്ന് മുഖ്യമന്ത്രിയും ആഭ്യന്തര വകുപ്പും വ്യക്തമാക്കുകയും ചെയ്തതോടെയാണ് പൊലീസിന്റെ നടപടികൾ വേഗത്തിലായത്. സംഭവത്തെക്കുറിച്ചുള്ള പൊലീസ് മേധാവിയുടെ അന്വേഷണ റിപ്പോർട്ടിന് പിന്നാലെയാണ് ഇപ്പോൾ ശ്രീനാദേവി കുഞ്ഞമ്മയടക്കമുള്ളവരെ പ്രതി ചേർത്തിരിക്കുന്നത്. അതേസമയം, ഏത് തരത്തിലുള്ള അന്വേഷണത്തെയും നിയമപരമായി നേരിടുമെന്ന് ശ്രീനാദേവി കുഞ്ഞമ്മ മാധ്യമങ്ങളോട് പ്രതികരിച്ചു. കേസിൽ പ്രധാന പ്രതികളെ ഉടനടി അറസ്റ്റ് ചെയ്യുന്നതിനുള്ള നീക്കങ്ങൾ പൊലീസ് ശക്തമാക്കിയിട്ടുണ്ട്.
