കേരള സംസ്ഥാന സ്കൂൾ കായികമേളയിൽ ഹാമർ ത്രോ വിഭാഗത്തിൽ വിജയക്കൊടി പാറിച്ച് കൊല്ലത്തിന്റെ മോസസ് ബിനു വർഗീസ് ശ്രദ്ധനേടുന്നു. പരിശീലിക്കാൻ കോച്ചോ സ്കൂളിൽ മതിയായ സൗകര്യങ്ങളോ ഇല്ലാതിരുന്ന പ്രതികൂല സാഹചര്യങ്ങളെ മറികടന്നാണ് കൊല്ലം പതാരം എസ്.എം.എച്ച്.എസ്.എസ് പ്ലസ് ടു വിദ്യാർത്ഥിയായ മോസസ് ഈ മിന്നുന്ന നേട്ടം സ്വന്തമാക്കിയത്.
കോവിഡിന്റെ അടച്ചിടൽ കാലത്താണ് മോസസ് ഹാമർ ത്രോയിലേക്ക് ശ്രദ്ധ കേന്ദ്രീകരിക്കുന്നത്. സാങ്കേതികമായി ഏറെ പ്രയാസമേറിയ ഈ ഇനത്തിൽ ശരിയായ നിർദ്ദേശങ്ങൾ നൽകാൻ നാട്ടിൽ പരിശീലകരില്ലാതിരുന്നതോടെ യൂട്യൂബ് വീഡിയോകളായിരുന്നു മോസസിന്റെ പ്രാഥമിക ഗുരു. യൂട്യൂബിൽ നിന്ന് തന്ത്രങ്ങൾ പഠിച്ചെടുത്ത്, സ്വന്തം പരിശീലന രംഗങ്ങൾ മൊബൈൽ ക്യാമറയിൽ പകർത്തി വീണ്ടും കണ്ടാണ് ഈ മിടുക്കൻ തന്റെ തെറ്റുകൾ ഓരോന്നായി തിരുത്തി മുന്നേറിയത്.
മകന്റെ വലിയ കായിക സ്വപ്നങ്ങൾക്ക് തണലായി നിന്നത് അച്ഛൻ ബിനു വർഗീസാണ്. വാഴക്കൃഷി നടത്തിയിരുന്ന തന്റെ ഒരേക്കറിലധികം പോരുന്ന സ്ഥലം കൃഷി മാറ്റി മകന് ഹാമർ ത്രോ പരിശീലിക്കാൻ പാകത്തിൽ വിട്ടുനൽകാൻ ഈ അച്ഛൻ തെല്ലും മടിച്ചില്ല. ആ പിന്തുണയും സ്വന്തം കഠിനാധ്വാനവുമാണ് ഇന്നലെ മത്സരക്കളത്തിൽ പൊന്നായി വിളഞ്ഞത്.
കഴിഞ്ഞ തവണത്തെ മേളയിൽ ഹാമർ ത്രോയിൽ 50.94 മീറ്റർ ദൂരം കണ്ടെത്തി സ്വർണം നേടിയിരുന്ന മോസസ്, ഇത്തവണ സീനിയർ ബോയ്സ് ഹാമർ ത്രോയിൽ 56.32 മീറ്റർ ദൂരത്തിലേക്ക് ഹാമർ എറിഞ്ഞെത്തിച്ചാണ് തുടർച്ചയായ രണ്ടാം സ്വർണം സ്വന്തമാക്കിയത്. റെക്കോർഡ് പ്രകടനത്തിന് ഒരു മീറ്റർ മാത്രം അകലെ വരെ എത്തുവാൻ മോസസിന് കഴിഞ്ഞു. പരിമിതികളെ അതിജീവിച്ച് വിജയം കൊയ്ത ഈ യുവതാരവും പൂർണ്ണ പിന്തുണ നൽകിയ കുടുംബവും കായിക ലോകത്തിന് വലിയൊരു മാതൃകയായി മാറുകയാണ്.
