എറണാകുളം ചേരാനല്ലൂരിൽ പ്രായപൂർത്തിയാകാത്ത കുട്ടി ഓടിച്ച ബെൻസ് കാറിടിച്ചു സ്കൂട്ടർ യാത്രികൻ മരിച്ച സംഭവത്തിൽ അന്വേഷണം ശക്തമാക്കാൻ സർക്കാർ തീരുമാനം. കേസ് അന്വേഷണത്തിനായി പ്രത്യേക അന്വേഷണ സംഘത്തെ (എസ്.ഐ.ടി.) രൂപവത്കരിക്കാൻ തീരുമാനിച്ചു. അപകടത്തിന് കാരണമായ വാഹനത്തിന്റെ ആർ.സി. ഉടമയും, വാഹനം ഓടിച്ച 17-കാരന്റെ പിതാവുമായ അഡീഷണൽ സെഷൻസ് ജഡ്ജിയെ കേസിൽ പ്രതിചേർക്കാനുള്ള നടപടികളിലേക്ക് പോലീസ് കടന്നിട്ടുണ്ട്. ജഡ്ജിക്കെതിരേ നടപടിയെടുക്കുന്നതിന് മുന്നോടിയായി ഹൈക്കോടതിയുടെ അനുമതിയും വിദഗ്ധ നിയമോപദേശവും തേടാനാണ് തീരുമാനം.
ഇന്നലെ പുലർച്ചെയുണ്ടായ ദാരുണമായ സംഭവത്തിൽ തട്ടുകട നടത്തി ജീവിക്കുന്ന മാഞ്ഞാലി സ്വദേശി ജയപാലകൃഷ്ണനാണ് മരിച്ചത്. ജോലി കഴിഞ്ഞ് പുലർച്ചെ വീട്ടിലേക്ക് മടങ്ങുകയായിരുന്ന അദ്ദേഹത്തിന്റെ ജീവനെടുത്തത് അമിതവേഗതയിലെത്തിയ ബെൻസ് കാറാണ്. നൂറിലധികം കിലോമീറ്റർ വേഗതയിൽ വാഹനം ഓടിക്കുന്ന ദൃശ്യങ്ങൾ പ്രതിയായ കുട്ടി മൊബൈൽ ഫോണിൽ പകർത്തുകയും ചെയ്തിരുന്നു. എന്നാൽ, തുടക്കത്തിൽ സ്റ്റേഷൻ ജാമ്യം നൽകി പ്രതിയെ വിട്ടയച്ച പൊലീസ് നടപടിക്കെതിരെ വ്യാപകമായ പ്രതിഷേധം ഉയർന്നു. മരിച്ച ജയപാലകൃഷ്ണന്റെ മകളും ബന്ധുക്കളും ചേരാനല്ലൂർ പോലീസ് സ്റ്റേഷന് മുന്നിൽ രാത്രിയോടെ ഉപരോധ സമരം നടത്തുകയും ചെയ്തു.
പ്രതിക്ക് എളുപ്പത്തിൽ ജാമ്യം ലഭിച്ച സംഭവത്തിൽ ആഭ്യന്തരമന്ത്രി ഡി.ജി.പിയെയും സിറ്റി പോലീസ് കമ്മിഷണറെയും വിളിച്ച് അതൃപ്തി അറിയിച്ചതിനെത്തുടർന്നാണ് ഇപ്പോൾ അന്വേഷണം ഊർജിതമാക്കിയിരിക്കുന്നത്. പ്രായപൂർത്തിയാകാത്ത കുട്ടി മുമ്പും വാഹനം ഓടിച്ചിട്ടുണ്ടോയെന്ന കാര്യം അടക്കം പോലീസ് പരിശോധിക്കുന്നുണ്ട്. പണത്തിന്റെയും സ്വാധീനത്തിന്റെയും പുറത്ത് കേസ് അട്ടിമറിക്കാൻ ശ്രമിക്കുകയാണെന്നും അച്ഛന് നീതി ലഭിക്കുന്നത് വരെ നിയമപോരാട്ടം തുടരുമെന്നുമാണ് കുടുംബത്തിന്റെ നിലപാട്. ഹൈക്കോടതിയെ സമീപിക്കുമെന്നും കുടുംബം വ്യക്തമാക്കിയിട്ടുണ്ട്.
