ഹോർമൂസ് കടലിടുക്കിൽ വെച്ച് കുവൈറ്റ് പതാകയുള്ള ക്രൂഡ് ഓയിൽ ടാങ്കറിന് നേരെ പ്രൊജക്റ്റൈൽ പതിച്ചുണ്ടായ അപകടത്തിൽപെട്ട അഞ്ച് ഇന്ത്യൻ നാവികരെ സുരക്ഷിതമായി കരയിലെത്തിച്ചു. ഇന്നലെ ഒമാനിലെ ഇന്ത്യൻ എംബസിയാണ് ഈ നിർണായക വിവരം പുറത്തുവിട്ടത്. ‘എംടി കാസിമ III’ (MT Kazimah III) എന്ന എണ്ണക്കപ്പലാണ് സന്ത്രപ്തമായ ഹോർമൂസ് കടലിടുക്കിലൂടെ സഞ്ചരിക്കുന്നതിനിടെ ആക്രമണത്തിന് ഇരയായത്. ഈ കപ്പലിൽ ജോലി ചെയ്തിരുന്ന അഞ്ച് ഇന്ത്യൻ പൗരന്മാരെയും ഇന്ത്യൻ എംബസിയുടെയും ഒമാൻ ഭരണകൂടത്തിന്റെയും സംയുക്തമായ ഇടപെടലിലൂടെയും ഏകോപനത്തിലൂടെയുമാണ് സുരക്ഷിതമായി ഒഴിപ്പിച്ചത്.
രക്ഷാപ്രവർത്തനങ്ങൾക്ക് ഒമാൻ അധികൃതർ നൽകിയ വേഗത്തിലുള്ളതും തുടർച്ചയായതുമായ പിന്തുണയ്ക്ക് മസ്കറ്റിലെ ഇന്ത്യൻ എംബസി നന്ദി അറിയിച്ചു. മിഡിൽ ഈസ്റ്റ് മേഖലയിലെ സമുദ്രപാതകളിൽ കപ്പലുകൾക്കും നാവികർക്കും നേരെ ഉണ്ടാകുന്ന തുടർച്ചയായ ആക്രമണങ്ങൾ വലിയ സുരക്ഷാ ആശങ്കകളാണ് സൃഷ്ടിക്കുന്നത്. അന്താരാഷ്ട്ര തലത്തിൽ സമുദ്രപാതകളുടെയും കപ്പൽ ജീവനക്കാരുടെയും സുരക്ഷ ഉറപ്പാക്കണമെന്ന് ഇന്ത്യ ഉൾപ്പെടെയുള്ള രാജ്യങ്ങൾ ഇതിനോടകം ശക്തമായി ആവശ്യപ്പെട്ടിട്ടുണ്ട്. കപ്പലിലുള്ള ഇന്ത്യക്കാരുടെ സുരക്ഷക്കായി വിദേശകാര്യ മന്ത്രാലയവും വിവിധ എംബസികളും സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണ്.
