രാജ്യത്ത് വ്യോമയാന ഇന്ധനമായ എ.ടി.എഫിന്റെ വിലയിൽ വലിയ വർധനവ്. ഇന്ധനവില ലിറ്ററിന് ഏകദേശം 16 രൂപയോളം വർധിപ്പിച്ചതോടെ നിരക്ക് 137 രൂപയിലെത്തി. മുൻപ് 121.28 രൂപയുണ്ടായിരുന്ന സ്ഥാനത്താണ് ഈ കുതിച്ചുചാട്ടം. അന്താരാഷ്ട്ര വിപണിയിലെ അസംസ്കൃത എണ്ണ വിലയിലെ മാറ്റങ്ങളും രൂപയുടെ മൂല്യവിലയിടർച്ചയുമാണ് നിരക്ക് വീണ്ടും ഉയരാൻ കാരണം.
ഇന്ന് മുതൽ പുതിയ നിരക്കുകൾ പ്രാബല്യത്തിൽ വന്നതോടെ സാധാരണക്കാരുടെ വിമാന യാത്രാ സ്വപ്നങ്ങൾക്ക് വീണ്ടും തിരിച്ചടിയായിരിക്കുകയാണ്. തുടർച്ചയായ മൂന്നാം മാസമാണ് എ.ടി.എഫ് വില കമ്പനികൾ വർധിപ്പിക്കുന്നത്. ഒരു വിമാനത്തിന്റെ മൊത്തത്തിലുള്ള പ്രവർത്തനച്ചെലവിന്റെ ഏകദേശം 40 ശതമാനത്തോളം വരുന്നത് ഇന്ധനവിലയാണ്. അതിനാൽ ഇന്ധന വിലയിലുണ്ടാകുന്ന ഈ വൻ വർധനവ് വിമാന കമ്പനികളുടെ പ്രവർത്തനച്ചെലവ് ക്രമാതീതമായി ഉയർത്തും.
ഈ വിലക്കയറ്റം ആഭ്യന്തര വിമാന സർവീസുകളെയും യാത്രാ ടിക്കറ്റ് നിരക്കിനെയും നേരിട്ട് ബാധിക്കുമെന്നാണ് വ്യോമയാന രംഗത്തെ വിദഗ്ധർ വിലയിരുത്തുന്നത്. യാത്രാക്കൂലി വർധിപ്പിക്കാൻ വിമാന കമ്പനികൾ നിർബന്ധിതരായേക്കാം. ഇതിനുപുറമേ, വാണിജ്യ ആവശ്യങ്ങൾക്കുള്ള പാചകവാതക (LPG) സിലിണ്ടറിന് 62.50 രൂപയും ഇതോടൊപ്പം വർധിപ്പിച്ചിട്ടുണ്ട്. ഇത് ഹോട്ടൽ-വ്യവസായ മേഖലകൾക്കും ഇരട്ടപ്രഹരമായി മാറി. തുടർച്ചയായ ഇന്ധന വിലക്കയറ്റം സാധാരണക്കാരുടെ ദൈനംദിന ബജറ്റിനെയും യാത്രാ പ്ലാനുകളെയും സാരമായി ബാധിക്കുമെന്ന് ഉറപ്പാണ്.
