ഗതാഗത നിയമലംഘനങ്ങള് കണ്ടെത്തുന്നതിനായി റോഡുകളില് സ്ഥാപിച്ചിട്ടുള്ള എ.ഐ ക്യാമറകളുടെ ഇ-ചെലാനുകളിൽ നിന്ന് ചിത്രങ്ങൾ ഒഴിവാക്കുന്നു എന്ന തരത്തിൽ സമൂഹമാധ്യമങ്ങളിൽ വ്യാപകമായി പ്രചരിക്കുന്ന വാർത്തകൾ തികച്ചും വ്യാജമാണെന്ന് കേരള മോട്ടോർ വാഹന വകുപ്പ് (MVD) ഔദ്യോഗികമായി വ്യക്തമാക്കി.
കഴിഞ്ഞ ദിവസങ്ങളില് വിവിധ ഓൺലൈൻ മാധ്യമങ്ങളിലും സോഷ്യല് മീഡിയയിലും ഇത് സംബന്ധിച്ച വലിയ ചര്ച്ചകളാണ് നടന്നിരുന്നത്. ഫൈൻ നോട്ടീസുകളിലും പോർട്ടലുകളിലും വാഹനങ്ങളുടെയും യാത്രക്കാരുടെയും ചിത്രങ്ങൾ ഉൾപ്പെടുത്തുന്നത് കുടുംബകലഹങ്ങള്ക്കും വ്യക്തിപരമായ പ്രശ്നങ്ങൾക്കും കാരണമാകുന്നുണ്ടെന്നും, ഇതേതുടർന്ന് എം.വി.ഡി ചിത്രങ്ങൾ ഒഴിവാക്കാൻ തീരുമാനിച്ചു എന്നുമായിരുന്നു പ്രധാന പ്രചാരണം. എന്നാൽ ഇത്തരം വ്യാജ വാർത്തകളും തെറ്റായ സന്ദേശങ്ങളും ജനങ്ങൾ യാതൊരു കാരണവശാലും വിശ്വസിക്കരുതെന്ന് അധികൃതർ ഇന്നലെ പുറത്തിറക്കിയ ഔദ്യോഗിക കുറിപ്പിലൂടെ കർശന മുന്നറിയിപ്പ് നൽകിയിട്ടുണ്ട്.
ഗതാഗത ലംഘനങ്ങൾ തെളിയിക്കുന്നതിനും പിഴ നടപടികൾക്ക് ഫോട്ടോ തെളിവുകൾ അത്യാവശ്യമാണെന്നിരിക്കെ, നിലവിലുള്ള സംവിധാനങ്ങളിൽ യാതൊരു മാറ്റവും വരുത്തിയിട്ടില്ലെന്ന് വകുപ്പ് വ്യക്തമാക്കുന്നു. വ്യാജ വാർത്തകൾ പ്രചരിപ്പിക്കുന്നവർക്കെതിരെ ജാഗ്രത പാലിക്കണമെന്നും, ഔദ്യോഗിക വിവരങ്ങൾക്കായി മോട്ടോർ വാഹന വകുപ്പിന്റെ വെബ്സൈറ്റുകളെ മാത്രം ആശ്രയിക്കണമെന്നും എം.വി.ഡി ഓർമ്മിപ്പിച്ചു.
