അതിശക്തമായ എൽ നിനോ പ്രതിഭാസവും കടുത്ത ഉഷ്ണതരംഗവും മൂലം അടുത്ത ആറുമാസത്തിനിടെ ലോകത്ത് 4.51 ലക്ഷത്തോളം അധിക മരണങ്ങൾ ഉണ്ടായേക്കാമെന്ന് പഠനം. ഷിക്കാഗോ സർവകലാശാല ക്ലൈമറ്റ് ഇംപാക്ട് ലാബ് ഇന്നലെ പുറത്തുവിട്ട പുതിയ റിപ്പോർട്ടിലാണ് ഈ ആശങ്കാജനകമായ വിവരമുള്ളത്. സാധാരണ വർഷങ്ങളെ അപേക്ഷിച്ച് ഈ കാലയളവിൽ ചൂടുകൂടിയ ദിവസങ്ങളുടെ എണ്ണം ആഗോളതലത്തിൽ 44 ശതമാനത്തോളം വർദ്ധിക്കുമെന്ന് ഗവേഷകർ വ്യക്തമാക്കുന്നു. ആഗോള ദക്ഷിണമേഖലാ രാജ്യങ്ങളെയാണ് ഈ പ്രതിഭാസം ഏറ്റവും രൂക്ഷമായി ബാധിക്കുകയെന്നും ഇതിൽ ഇന്ത്യയിൽ മാത്രം 15,800 അധിക മരണങ്ങൾ സംഭവിക്കാൻ സാധ്യതയുണ്ടെന്നും പഠനത്തിന് നേതൃത്വം നൽകിയ മൈക്കൽ ഗ്രീൻസ്റ്റോൺ ഉൾപ്പെടെയുള്ള വിദഗ്ധർ മുന്നറിയിപ്പ് നൽകുന്നു.
ആഫ്രിക്കയിലെ സാഹേൽ മേഖലയിലും നൈജീരിയ, ഇന്തോനേഷ്യ തുടങ്ങിയ രാജ്യങ്ങളിലുമാണ് ഏറ്റവും കൂടുതൽ ചൂടുമൂലമുള്ള മരണങ്ങൾ പ്രവചിക്കപ്പെട്ടിട്ടുള്ളത്. ഇന്ത്യ പോലുള്ള രാജ്യങ്ങളിൽ ഡിസംബർ മുതൽ ഫെബ്രുവരി വരെയുള്ള മാസങ്ങളിൽ ഈ അപകടാവസ്ഥ കൂടുതൽ തീവ്രമാകുമെന്നാണ് വിലയിരുത്തൽ. ഭാവിയിലെ കാലാവസ്ഥാ വ്യതിയാനം ലോകത്തിന് മുൻകൂട്ടി കാണിച്ചുതരുന്ന ഒരു ‘പോസ്റ്റ്കാർഡ്’ എന്നാണ് ഗവേഷകർ ഈ സൂപ്പർ എൽ നിനോ പ്രതിഭാസത്തെ വിശേഷിപ്പിച്ചിരിക്കുന്നത്. ദുരന്തങ്ങൾ ഒഴിവാക്കാൻ മുൻകൂട്ടിയുള്ള ജാഗ്രതാ നടപടികളും അടിയന്തര പ്രതിരോധ പദ്ധതികളും സർക്കാരുകൾ ഉടൻ നടപ്പിലാക്കണമെന്നും വിദഗ്ധർ ഓർമ്മിപ്പിക്കുന്നു.
