കോഴിക്കോട്: ഇടതുപക്ഷ രാഷ്ട്രീയത്തിന്റെ കരുത്ത് തെളിയിക്കിക്കൊണ്ട് കോഴിക്കോട് നഗരത്തിൽ സംഘടിപ്പിക്കുന്ന മഹാസമ്മേളനവും റാലിയും നാളെ നടക്കും. സിപിഐഎം ജനറൽ സെക്രട്ടറി എം.എ. ബേബി മഹാറാലി ഔദ്യോഗികമായി ഉദ്ഘാടനം ചെയ്യും. പാർട്ടിയുടെ സംസ്ഥാന സമിതി യോഗത്തിന്റെ ഭാഗമായി സംഘടിപ്പിക്കുന്ന ഈ ബ്രഹ്മാണ്ഡ സംഗമത്തിൽ ലക്ഷക്കണക്കിന് പ്രവർത്തകർ അണിനിരക്കുമെന്നാണ് സംഘാടകരുടെ വിലയിരുത്തൽ. കോഴിക്കോട് ബീച്ചിലെ ഫ്രീഡം സ്ക്വയറിൽ നാളെ വൈകീട്ട് 4 മണിക്കാണ് റാലി ആരംഭിക്കുന്നത്. ഇന്നലെ ആരംഭിച്ച സിപിഐഎമ്മിന്റെ മൂന്ന് നീളുന്ന വിപുലമായ സംസ്ഥാന സമിതി യോഗത്തിന്റെ സമാപനം കുറിച്ചുകൊണ്ടാണ് ഈ വൻ ജനസാഗരം തീർക്കുന്ന സമ്മേളനം നടക്കുന്നത്.
വരാനിരിക്കുന്ന രാഷ്ട്രീയ വെല്ലുവിളികളെ പ്രതിരോധിക്കാനും, പാർട്ടി സംഘടനയെ കൂടുതൽ ജനകീയ അടിത്തറയോടെ ശക്തിപ്പെടുത്താനുമുള്ള കർമ്മപദ്ധതികൾ ഈ സമ്മേളനം ചർച്ച ചെയ്യും. രാഷ്ട്രീയ കേരളം ഉറ്റുനോക്കുന്ന ഈ സമ്മേളനത്തിൽ എം.എ. ബേബിക്കൊപ്പം പോളിറ്റ് ബ്യൂറോ അംഗങ്ങളായ പിണറായി വിജയൻ, എ. വിജയരാഘവൻ, സംസ്ഥാന സെക്രട്ടറി എം.വി. ഗോവിന്ദൻ തുടങ്ങിയ പ്രമുഖ നേതാക്കളും അഭിസംബോധന ചെയ്ത് സംസാരിക്കും.
തിരഞ്ഞെടുപ്പ് പരാജയങ്ങളിലെ വീഴ്ചകൾ ആത്മപരിശോധന നടത്തി തിരുത്തുമെന്നും, ജനങ്ങളുടെ വിശ്വാസം വീണ്ടെടുത്ത് മുന്നോട്ട് പോകുമെന്നും പ്രഖ്യാപിക്കുന്ന നിർണ്ണായക സന്ദർഭത്തിലാണ് നാളത്തെ ഈ മഹാറാലി നടക്കുന്നത് എന്നത് രാഷ്ട്രീയമായി ഏറെ ശ്രദ്ധേയമാണ്. നാളെ നടക്കുന്ന ഈ മഹാസമ്മേളനത്തിലേക്ക് കേരളത്തിന്റെ വിവിധ ഭാഗങ്ങളിൽ നിന്നുള്ള പാർട്ടി പ്രവർത്തകരും അനുഭാവികളും കോഴിക്കോട്ടേക്ക് എത്തിച്ചേർന്നുകൊണ്ടിരിക്കുകയാണ്.
