സംസ്ഥാനത്ത് ഏറെ കോലാഹലങ്ങൾ സൃഷ്ടിച്ച ആസൂത്രണ ബോർഡ് പരീക്ഷാ ക്രമക്കേട് കേസിൽ നിർണായക നീക്കവുമായി ക്രൈംബ്രാഞ്ച്. പിഎസ്സി അംഗങ്ങൾക്ക് പ്രത്യേക നിയമപരിരക്ഷയൊന്നുമില്ലെന്നും ചോദ്യം ചെയ്യലിനായി ഓഫീസിൽ നേരിട്ട് ഹാജരാകണമെന്നും അന്വേഷണ സംഘം വ്യക്തമാക്കിയതായി ഇന്നലെ പുറത്തുവന്ന റിപ്പോർട്ടുകൾ വ്യക്തമാക്കുന്നു. കേസിൽ സെപ്റ്റംബർ 15 മുതൽ ചോദ്യം ചെയ്യലിന് ഹാജരാകാൻ ആവശ്യപ്പെട്ട് പിഎസ്സി ചെയർമാൻ എം.ആർ. ബൈജുവിനും മറ്റ് അംഗങ്ങൾക്കും ക്രൈംബ്രാഞ്ച് പ്രത്യേക അന്വേഷണ സംഘം (SIT) നോട്ടീസ് അയച്ചിരുന്നു. എന്നാൽ ഭരണഘടനാ പദവിയും പ്രോട്ടോക്കോളും ചൂണ്ടിക്കാട്ടി ക്രൈംബ്രാഞ്ച് ആസ്ഥാനത്തേക്ക് പോകില്ലെന്ന നിലപാടിലാണ് പിഎസ്സി അംഗങ്ങൾ. ചോദ്യം ചെയ്യണമെങ്കിൽ കമ്മീഷൻ ആസ്ഥാനത്ത് വരണമെന്നാണ് ആവശ്യം. ഇതിനെതിരെയാണ് ക്രൈംബ്രാഞ്ച് ശക്തമായ നിലപാടുമായി രംഗത്തെത്തിയിരിക്കുന്നത്. ക്രിമിനൽ നിയമപ്രകാരം പ്രത്യേക ഇളവുകൾ ഇല്ലാത്തതിനാൽ അംഗങ്ങൾ അന്വേഷണവുമായി സഹകരിക്കണമെന്നാണ് നിയമവൃത്തങ്ങളുടെയും നിലപാട്.
ആസൂത്രണ ബോർഡിലെ ചീഫ് (ഇൻഡസ്ട്രി ആൻഡ് ഇൻഫ്രാസ്ട്രക്ചർ) തസ്തികയിലേക്കുള്ള പരീക്ഷയിൽ വലിയ തോതിലുള്ള മൂല്യനിർണ്ണയ തട്ടിപ്പുകൾ നടന്നതായി ക്രൈംബ്രാഞ്ച് കണ്ടെത്തിയിരുന്നു. ഡിജിറ്റൽ മൂല്യനിർണ്ണയത്തിനിടയിൽ നിർണായകമായ ചോദ്യങ്ങൾ ഒഴിവാക്കപ്പെടുകയും ഇത് വഴി അനർഹരായവർക്ക് റാങ്ക് ലിസ്റ്റിൽ മുൻനിരയിലെത്താൻ അവസരമൊരുങ്ങുകയും ചെയ്തുവെന്നാണ് പ്രധാന കണ്ടെത്തൽ. സംഭവത്തിൽ ഗുരുതര വീഴ്ച വരുത്തിയ രണ്ട് പിഎസ്സി ഉദ്യോഗസ്ഥർക്കെതിരെ വകുപ്പുതല നടപടി സ്വീകരിക്കാനും ഡിജിപി സർക്കാരിന് ശുപാർശ നൽകിയിട്ടുണ്ട്. കൂടാതെ, വിവാദമായ ഈ നിയമന ശിപാർശ പുനഃപരിശോധിക്കണമെന്നും ആവശ്യപ്പെട്ട് അന്വേഷണ സംഘം സർക്കാരിന് ഔദ്യോഗികമായി കത്ത് നൽകിയിട്ടുണ്ട്.
