യുക്രെയ്നുവേണ്ടി നിർണായകമായ ആയുധ സാങ്കേതികവിദ്യ കൈമാറുന്ന ബ്രിട്ടനും ഫ്രാൻസിനും എതിരെ രൂക്ഷമായ മുന്നറിയിപ്പുമായി റഷ്യ. യൂറോപ്യൻ രാജ്യങ്ങൾ ‘തീ കൊണ്ട് കളിക്കുക’യാണെന്ന് റഷ്യൻ വിദേശകാര്യ മന്ത്രാലയ വക്താവ് മരിയ സഖാരോവ കഴിഞ്ഞ ദിവസമാണ് ഔദ്യോഗികമായി വ്യക്തമാക്കിയത്. യുക്രെയ്ന് സ്വന്തമായി ദൂരപരിധിയുള്ള സ്റ്റോം ഷാഡോ ക്രൂയിസ് മിസൈലുകൾ നിർമ്മിക്കുന്നതിനുള്ള സാങ്കേതിക വിദ്യയും ബ്ലൂപ്രിന്റുകളും കൈമാറാൻ ബ്രിട്ടൻ തയ്യാറായതാണ് റഷ്യയെ പ്രകോപിപ്പിച്ചത്. ഫ്രാൻസും സമാനമായ രീതിയിൽ മിസൈൽ സാങ്കേതികവിദ്യ നൽകാൻ അനുമതി നൽകിയിട്ടുണ്ട്.
റഷ്യൻ പ്രദേശങ്ങൾ ലക്ഷ്യമാക്കി യുക്രെയ്ൻ ഈ ബ്രിട്ടീഷ് മിസൈലുകൾ ഉപയോഗിക്കുകയാണെങ്കിൽ, യുക്രെയ്നു അകത്തും പുറത്തുമുള്ള ബ്രിട്ടീഷ് സൈനിക കേന്ദ്രങ്ങൾക്കും ഉപകരണങ്ങൾക്കുമെതിരെ ശക്തമായ തിരിച്ചടി ഉണ്ടാകുമെന്ന് മരിയ സഖാരോവ മുന്നറിയിപ്പ് നൽകി. ലണ്ടന്റെ ഈ ശത്രുതാപരമായ നടപടി സംഘർഷത്തെ തികച്ചും പുതിയൊരു തലത്തിലേക്ക് എത്തിക്കുമെന്നും, റഷ്യക്കെതിരായ ഭീകരവാദ പ്രവർത്തനങ്ങളിൽ ബ്രിട്ടൻ പങ്കാളിയാകുന്നതിന് തുല്യമാണിതെന്നും റഷ്യ കുറ്റപ്പെടുത്തുന്നു.
റഷ്യയുടെ നിയന്ത്രണത്തിലുള്ള ഡൊനെറ്റ്സ്കിലെ ഒരു ഷോപ്പിംഗ് കേന്ദ്രത്തിന് നേരെ യുക്രെയ്ൻ സ്റ്റോം ഷാഡോ മിസൈലുകൾ ഉപയോഗിച്ച് ആക്രമണം നടത്തിയതായി റഷ്യ ആരോപിച്ചതിന് തൊട്ടുപിന്നാലെയാണ് ഈ കടുത്ത മുന്നറിയിപ്പ് പുറത്തുവന്നിരിക്കുന്നത്. സമാധാന ചർച്ചകളിലേക്കുള്ള ചെറിയൊരു പുരോഗതി പോലും തടയുന്നതാണ് പാശ്ചാത്യ രാജ്യങ്ങളുടെ ഈ ഇടപെടലുകളെന്ന് ക്രെംലിൻ വക്താവ് ദിമിത്രി പെസ്കോവും പ്രതികരിച്ചു. യുക്രെയ്ൻ യുദ്ധത്തിൽ നാറ്റോ രാജ്യങ്ങളുടെ നേരിട്ടുള്ള ഇടപെടൽ കൂടുതൽ വ്യാപകമാകുന്നതും, അത് മൂന്നാം ലോകമഹായുദ്ധത്തിലേക്ക് കാര്യങ്ങൾ എത്തിക്കുമോ എന്ന ആശങ്കയും അന്താരാഷ്ട്രതലത്തിൽ വീണ്ടും ശക്തമാക്കിയിരിക്കുകയാണ് ഈ സംഭവവികാസങ്ങൾ.
