ചൈനീസ് ഉൽപ്പന്നങ്ങളുടെ മേലുള്ള ഉയർന്ന അമേരിക്കൻ താരിഫുകൾ മറികടക്കാൻ ഇന്ത്യയടക്കം 40-ലധികം രാജ്യങ്ങൾ അനധികൃതമായി സഹായിച്ചതായി യുണൈറ്റഡ് സ്റ്റേറ്റ്സ് ആരോപിച്ചു. ഇന്നലെ പുറത്തുവിട്ട ‘ദി ഗ്രേറ്റ് ട്രാൻസ്ഷിപ്പ്മെന്റ് സ്കാം’ എന്ന പുതിയ റിപ്പോർട്ടിലാണ് യു.എസിന്റെ ഈ നിർണായക വെളിപ്പെടുത്തൽ. യു.എസ് പ്രസിഡന്റിന്റെ വ്യാപാര ഉപദേഷ്ടാവായ പീറ്റർ നവാരോയാണ് ഈ റിപ്പോർട്ട് പുറത്തുവിട്ടത്.
ചൈനീസ് കയറ്റുമതി മറ്റ് രാജ്യങ്ങൾ വഴി റൂട്ട് ചെയ്ത് ഉൽപ്പന്നങ്ങളുടെ യഥാർത്ഥ ഉറവിടം മറയ്ക്കുന്ന ‘ഷാഡോ ട്രാൻസ്ഷിപ്പ്മെന്റ് നെറ്റ്വർക്ക്’ ഈ രാജ്യങ്ങൾ പ്രവർത്തിപ്പിക്കുന്നു എന്നാണ് റിപ്പോർട്ടിൽ കുറ്റപ്പെടുത്തുന്നത്. കാനഡ, മെക്സിക്കോ, യൂറോപ്യൻ യൂണിയൻ, ജപ്പാൻ, ദക്ഷിണ കൊറിയ തുടങ്ങിയ പ്രമുഖ വ്യാപാര പങ്കാളികൾക്കൊപ്പം ഇന്ത്യയെയും ഇതിൽ ഉൾപ്പെടുത്തിയിട്ടുണ്ട്. ഇന്ത്യയിലെ പൂനെ-ഗുജറാത്ത്-ചെന്നൈ വ്യാവസായിക മേഖലയിലൂടെ ചൈനീസ് നിർമ്മിത പമ്പുകളും കംപ്രസ്സറുകളും മറ്റും കയറ്റി അയച്ച് ലേബൽ മാറ്റുന്നുവെന്ന് റിപ്പോർട്ട് ചൂണ്ടിക്കാണിക്കുന്നു.
ഈ അനധികൃത ഇടപാടുകൾ തടയുന്നതിനായി ആർട്ടിഫിഷ്യൽ ഇന്റലിജൻസ് (AI) അധിഷ്ഠിതമായ ‘ഡിറ്റക്ടീവ് ബോർഡർ’ സംവിധാനം നടപ്പിലാക്കുമെന്ന് അമേരിക്ക വ്യക്തമാക്കി. ചരക്കുകളുടെ റൂട്ടിംഗ് ചരിത്രവും ഉൽപ്പന്ന വിവരങ്ങളും നിരീക്ഷിക്കാൻ ഈ സംവിധാനത്തിലൂടെ സാധിക്കും. കമ്മ്യൂണിസ്റ്റ് ചൈനീസ് കയറ്റുമതികൾക്ക് മൂന്നാം രാജ്യങ്ങൾ ലാവ്ലറിംഗ് കേന്ദ്രങ്ങളായി പ്രവർത്തിക്കുന്നത് അംഗീകരിക്കാനാകില്ലെന്ന് പീറ്റർ നവാരോ വ്യക്തമാക്കി. അമേരിക്കയുടെ ഈ പുതിയ നീക്കം അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.
