ജാർഖണ്ഡ് പബ്ലിക് സർവീസ് കമ്മീഷൻ (JPSC), സ്റ്റാഫ് സെലക്ഷൻ കമ്മീഷൻ (JSSC) പരീക്ഷകളിലെ വ്യാപക ക്രമക്കേടുകൾക്കെതിരെ തലസ്ഥാനമായ റാഞ്ചിയിൽ ഉദ്യോഗാർത്ഥികളുടെ ശക്തമായ പ്രതിഷേധം തുടരുന്നു. പരീക്ഷകളിലെ അഴിമതിയെക്കുറിച്ച് സി.ബി.ഐ (CBI) അന്വേഷണം പ്രഖ്യാപിക്കണമെന്നാവശ്യപ്പെട്ട് ആയിരക്കണക്കിന് യുവജനങ്ങൾ നടത്തുന്ന പ്രക്ഷോഭം ദിവസങ്ങളായി തുടരുകയാണ്. സംസ്ഥാനത്തെ റിക്രൂട്ട്മെന്റ് തട്ടിപ്പുകളുമായി ബന്ധപ്പെട്ട് കഴിഞ്ഞ ദിവസം മുൻ JPSC ചെയർമാൻ എൽ. ഖിയാംഗ്ലെയെ സി.ഐ.ഡി (CID) അറസ്റ്റ് ചെയ്തത് സമരത്തിന്റെ ഗൗരവം വർദ്ധിപ്പിച്ചു.
പരീക്ഷാ ക്രമക്കേടുകൾ അന്വേഷിക്കാൻ സി.ബി.ഐയോ ഹൈക്കോടതി റിട്ടയേർഡ് ജഡ്ജിമാരുടെ സമിതിയോ വേണമെന്നാണ് സമരക്കാരുടെ പ്രധാന ആവശ്യം. വിവിധ പരീക്ഷകളുടെ ചോദ്യപേപ്പർ ചോർച്ചയും മൂല്യനിർണ്ണയത്തിലെ അട്ടിമറികളും ഉദ്യോഗാർത്ഥികളുടെ ഭാവി അനിശ്ചിതത്വത്തിലാക്കിയെന്ന് ‘ജെ.പി.എസ്.സി – ജെ.എസ്.എസ്.സി റിഫോംസ് മഞ്ച്’ നേതൃത്വം ആരോപിക്കുന്നു. സമരത്തെ തുടർന്ന് സർക്കാരുമായി നടത്തിയ ചർച്ചകൾ പരാജയപ്പെട്ടതിനെത്തുടർന്ന് ഉദ്യോഗാർത്ഥികൾ നിയമസഭയിലേക്ക് നടത്തിയ മാർച്ച് സംഘർഷത്തിലും കലാശിച്ചിരുന്നു.
പ്രതിഷേധം ശക്തമായതോടെ ജാർഖണ്ഡിലെ രാഷ്ട്രീയ രംഗവും ചൂടുപിടിച്ചിരിക്കുകയാണ്. സംസ്ഥാന സർക്കാർ പലതലത്തിലുള്ള ചർച്ചകൾ നടത്തിയും, പ്രതിരോധ നടപടികളിലേക്ക് കടന്നും സമരത്തെ നേരിടാൻ ശ്രമിക്കുന്നുണ്ടെങ്കിലും ഉദ്യോഗാർത്ഥികൾ തങ്ങളുടെ ആവശ്യങ്ങളിൽ ഉറച്ചുനിൽക്കുകയാണ്. സി.ബി.ഐ അന്വേഷണം പ്രഖ്യാപിക്കുന്നത് വരെ സമരം അവസാനിപ്പിക്കില്ലെന്ന നിലപാടിലാണ് യുവജന സംഘടനകൾ. നിലവിൽ മുൻ ചെയർമാൻ അടക്കം ഇരുപതോളം പേരാണ് കേസിൽ സി.ഐ.ഡിയുടെ പിടിയിലായിട്ടുള്ളത്. എങ്കിലും കേസിന്റെ വ്യാപ്തിയും ഗൗരവവും കണക്കിലെടുത്ത് കേന്ദ്ര ഏജൻസി അന്വേഷണം വേണമെന്ന ആവശ്യത്തിൽ തന്നെയാണ് ഉദ്യോഗാർത്ഥികൾ.
