ഇന്ത്യൻ ഫുട്ബോൾ ചരിത്രത്തിലെ ഏറ്റവും തിളക്കമേറിയ അധ്യായത്തിന് കളമൊരുങ്ങുന്നു. അഞ്ച് തവണ ലോക ചാമ്പ്യന്മാരായ ബ്രസീൽ ദേശീയ ഫുട്ബോൾ ടീം ആദ്യമായി ഇന്ത്യൻ മണ്ണിൽ സൗഹൃദ മത്സരം കളിക്കാനെത്തുന്നു. ഈ വർഷം ഒക്ടോബർ 3-ന് കൊൽക്കത്തയിലെ വിവേകാനന്ദ യുവഭാരതി ക്രിരംഗൻ സ്റ്റേഡിയത്തിലാണ് (സാൾട്ട് ലേക്ക് സ്റ്റേഡിയം) ചരിത്രപ്രധാനമായ ഈ മത്സരം നടക്കുക. ഓൾ ഇന്ത്യ ഫുട്ബോൾ ഫെഡറേഷനും (AIFF) ബ്രസീലിയൻ ഫുട്ബോൾ കോൺഫെഡറേഷനും (CBF) സംയുക്തമായാണ് ഈ സുപ്രധാന വിവരം ഔദ്യോഗികമായി പുറത്തുവിട്ടത്.
ഫിഫ റാങ്കിംഗിൽ നിലവിൽ അഞ്ചാം സ്ഥാനത്തുള്ള ബ്രസീൽ, 1992-ൽ ഫിഫ റാങ്കിംഗ് സമ്പ്രദായം നിലവിൽ വന്നതിനുശേഷം ഇന്ത്യൻ ദേശീയ ടീം നേരിടുന്ന ഏറ്റവും മികച്ച റാങ്കിംഗിലുള്ള എതിരാളികളെന്ന നിലയിലും ഈ മത്സരം ഏറെ ശ്രദ്ധേയമാണ്. മാർക്വിനോസ്, കസേമിറോ, വിനീഷ്യസ് ജൂനിയർ തുടങ്ങിയ ലോകോത്തര താരങ്ങൾ അണിനിരക്കുന്ന ‘സെലെസാവോ’ നിരയെ സ്വന്തം നാട്ടിൽ നേരിടാൻ കഴിയുന്നതിന്റെ ആവേശത്തിലാണ് ഇന്ത്യൻ കളിക്കാരും ലക്ഷക്കണക്കിന് ആരാധകരും.
1977-ൽ ഇതിഹാസതാരം പെലെയും, പിന്നീട് ലയണൽ മെസ്സിയും കൊൽക്കത്തയുടെ കാൽപന്താരാധനയ്ക്ക് വേദിയൊരുക്കിയ ചരിത്രത്തിലേക്ക് മറ്റൊരു പൊൻതൂവൽ കൂടി ചേർക്കപ്പെടുകയാണ്. ഓസ്ട്രേലിയക്കെതിരായ പരമ്പരയ്ക്ക് ശേഷമാണ് ബ്രസീൽ സംഘം ഇന്ത്യയിലേക്ക് എത്തുന്നത്. ഇന്ത്യൻ ഫുട്ബോളിന്റെ വളർച്ചയ്ക്കും കളിക്കാർക്ക് അന്താരാഷ്ട്ര നിലവാരം അനുഭവിച്ചറിയുന്നതിനും ഈ മത്സരം വലിയ വഴിത്തിരിവാകുമെന്ന് എ.ഐ.എഫ്.എഫ് അധികൃതർ വ്യക്തമാക്കി. ഫുട്ബോൾ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ഈ അവിസ്മരണീയ പോരാട്ടത്തിന്റെ ഒരുക്കങ്ങൾ ഇതിനോടകം തന്നെ ആരംഭിച്ചു കഴിഞ്ഞു.
