എറണാകുളം മഹാരാജാസ് കോളേജിലെ എസ്.എഫ്.ഐ. യൂണിറ്റ് സെക്രട്ടറിയായിരുന്ന അഭിമന്യു കൊല്ലപ്പെട്ട കേസിൽ നിർണായക വഴിത്തിരിവ്. വിചാരണ നടപടികൾ ആരംഭിക്കുന്ന തീയതി എറണാകുളം പ്രിൻസിപ്പൽ സെഷൻസ് കോടതി ഇന്ന് തീരുമാനിക്കും. കേസിന്റെ വിചാരണ നീണ്ടുപോകരുതെന്ന ഹൈക്കോടതിയുടെ കർശന നിർദ്ദേശത്തിന് പിന്നാലെയാണ് കോടതിയുടെ ഈ നടപടി.
2018 ജൂലൈ രണ്ടിനാണ് കോളേജ് കാമ്പസിലുണ്ടായ സംഘർഷത്തിനിടയിൽ മഹാരാജാസ് കോളേജിലെ ബിരുദ വിദ്യാർത്ഥിയായ അഭിമന്യു കുത്തേറ്റ് കൊല്ലപ്പെട്ടത്. കാമ്പസ് ഫ്രണ്ട് – പോപ്പുലർ ഫ്രണ്ട് പ്രവർത്തകരാണ് കൊലപാതകത്തിന് പിന്നിലെന്നാണ് പ്രോസിക്യൂഷൻ കേസ്. ചുവരെഴുത്തുമായി ബന്ധപ്പെട്ട തർക്കങ്ങളെ തുടർന്നുണ്ടായ അക്രമത്തിൽ അഭിമന്യു ഉൾപ്പെടെയുള്ള വിദ്യാർത്ഥികൾക്ക് കുത്തേൽക്കുകയായിരുന്നു.
കേസിൽ ആകെ 26 പ്രതികളാണുള്ളത്. ഇതിൽ പ്രധാനപ്പെട്ട 16 പ്രതികൾ കഴിഞ്ഞ ദിവസം കോടതിയിൽ നേരിട്ട് ഹാജരായി കുറ്റം നിഷേധിച്ചിരുന്നു. പ്രോസിക്യൂഷൻ കുറ്റപത്രം വായിച്ചുകേൾപ്പിച്ചെങ്കിലും തങ്ങൾക്കെതിരെയുള്ള ആരോപണങ്ങൾ വ്യാജമാണെന്നാണ് പ്രതികൾ കോടതിയെ അറിയിച്ചത്. തുടർന്ന്, വിചാരണയ്ക്കുള്ള സാക്ഷിപ്പട്ടികയും മറ്റ് അനുബന്ധ രേഖകളും ഇന്ന് കോടതിയിൽ സമർപ്പിക്കാൻ പ്രോസിക്യൂഷന് നിർദ്ദേശം നൽകിയിരുന്നു. സ്പെഷ്യൽ പബ്ലിക് പ്രോസിക്യൂട്ടർ ജി. മോഹൻരാജാണ് പ്രോസിക്യൂഷന് വേണ്ടി ഹാജരാകുന്നത്.
കേസ് രജിസ്റ്റർ ചെയ്ത് വർഷങ്ങൾ കഴിഞ്ഞിട്ടും വിവിധ നിയമ തടസ്സങ്ങളും സുപ്രധാന കോടതി രേഖകൾ കാണാതായതും അടക്കമുള്ള സംഭവങ്ങൾ വിചാരണ വൈകിപ്പിച്ചിരുന്നു. എന്നാൽ രേഖകൾ പുനഃസ്ഥാപിക്കുകയും, വിചാരണ നടപടികൾ സ്റ്റേ ചെയ്യണമെന്നാവശ്യപ്പെട്ട് പ്രതികൾ നൽകിയ ഹർജികൾ ഹൈക്കോടതി തള്ളിക്കളയുകയും ചെയ്തതോടെയാണ് വിചാരണയ്ക്കുള്ള തടസ്സങ്ങൾ നീങ്ങിയത്. അഭിമന്യുവിന്റെ കുടുംബത്തിന്റെ നിയമപോരാട്ടത്തെ തുടർന്ന് ഒമ്പത് മാസത്തിനകം വിചാരണ പൂർത്തിയാക്കാനാണ് ഹൈക്കോടതിയുടെ ഉത്തരവ്. ഇന്നത്തെ കോടതി നടപടികളിലൂടെ നീണ്ട വർഷത്തെ കാത്തിരിപ്പിനൊടുവിൽ വിചാരണാ തീയതി ഔദ്യോഗികമായി പുറത്തുവരുമെന്നാണ് പ്രതീക്ഷിക്കുന്നത്.
