വടക്കാഞ്ചേരി റോയൽ ജംഗ്ഷന് സമീപം ദീർഘദൂര ബസും സിഎൻജി ഗ്യാസ് ലോറിയും കൂട്ടിയിടിച്ച് വൻ അപകടം. ഇടിയുടെ ആഘാതത്തിൽ ഗ്യാസ് സിലിണ്ടറുകൾ കയറ്റിയ ലോറി മറിയുകയും വാതകം ചോരുകയും ചെയ്തതോടെ പ്രദേശത്ത് പരിഭ്രാന്തി പരന്നു. തിങ്കളാഴ്ച പുലർച്ചെ ഒരു മണിയോടെയായിരുന്നു സംഭവം.
അപകടത്തിൽ ബസ് ഡ്രൈവർ അഭിഷേക്, സഹായി നഞ്ചട്ട സ്വാമി എന്നിവർ ഉൾപ്പെടെ ഒമ്പത് പേർക്കാണ് പരിക്കേറ്റത്. ബസ് ഡ്രൈവർക്കും സഹായിക്കും ശരീരത്തിൽ പൊള്ളലേറ്റിട്ടുണ്ട്. ഇവരെ കൂടാതെ ബസിലുണ്ടായിരുന്ന ഏഴ് യാത്രക്കാർക്കും നിസ്സാര പരിക്കുകളുണ്ട്. പരിക്കേറ്റവരെ ഉടൻ തന്നെ സമീപത്തെ ഇരട്ടക്കുളം സ്വകാര്യ ആശുപത്രിയിൽ പ്രവേശിപ്പിച്ചു.
അപകടത്തിന്റെ പശ്ചാത്തലം
തങ്കം ജംഗ്ഷനിൽ നിന്ന് സർവീസ് റോഡിലൂടെ വരികയായിരുന്ന ദീർഘദൂര ബസും, കെ.എസ്.ആർ.ടി.സി ഡിപ്പോ ഭാഗത്തെ അടിപ്പാതയിലൂടെ സർവീസ് റോഡിലേക്ക് പ്രവേശിക്കുകയായിരുന്ന സിഎൻജി ഗ്യാസ് ലോറിയുമാണ് റോയൽ ജംഗ്ഷന് സമീപത്തുവെച്ച് കൂട്ടിയിടിച്ചത്. ലോറിയിൽ വാഹനങ്ങളിൽ ഇന്ധനമായി ഉപയോഗിക്കുന്ന നാൽപതോളം സിഎൻജി സിലിണ്ടറുകൾ ഉണ്ടായിരുന്നു.
രക്ഷാപ്രവർത്തനം
ഇടിയുടെ ആഘാതത്തിൽ ലോറി മറിയുകയും സിലിണ്ടറുകളിൽ നിന്ന് ഉഗ്രശബ്ദത്തോടെ വാതകം പുറത്തേക്ക് ചീറ്റുകയുമായിരുന്നു. വാതകം പുറത്തേക്ക് വന്ന സമയത്താണ് ബസ് ഡ്രൈവർ അഭിഷേകിനും സഹായി നഞ്ചട്ട സ്വാമിക്കും പൊള്ളലേറ്റത്. വിവരമറിഞ്ഞ് ഉടൻ തന്നെ വടക്കാഞ്ചേരി അഗ്നിരക്ഷാസേന സ്ഥലത്തെത്തി. അതിവേഗത്തിൽ രക്ഷാപ്രവർത്തനം നടത്തിയ അഗ്നിരക്ഷാസേന ഉദ്യോഗസ്ഥർ വാതകം നിർവീര്യമാക്കിയതിലൂടെ വലിയൊരു ദുരന്തമാണ് ഒഴിവായത്. ഹൈവേ പൊലീസും വടക്കാഞ്ചേരി പൊലീസും സ്ഥലത്തെത്തി ഗതാഗതം നിയന്ത്രിക്കുകയും തുടർനടപടികൾ സ്വീകരിക്കുകയും ചെയ്തു.
