2026 ഫിഫ ലോകകപ്പിൽ ഗ്രൂപ്പ് എഫിലെ നിർണായക മത്സരത്തിൽ തുനീസിയയെ പരാജയപ്പെടുത്തി നെതർലൻഡ്സ് പ്രീ-ക്വാർട്ടറിലേക്ക് . ഒന്നിനെതിരെ മൂന്ന് ഗോളുകൾക്കാണ് റൊണാൾഡ് കോമാന്റെ സംഘം വിജയം സ്വന്തമാക്കിയത്. ഈ തോൽവിയോടെ തുനീസിയ ലോകകപ്പിൽ നിന്ന് പുറത്തായി.
തുടക്കം മുതൽ ആക്രമിച്ചു കളിച്ച ഡച്ച് പട തുടക്കത്തിൽ തന്നെ ലീഡ് നേടി. മൂന്നാം മിനിറ്റിൽ തുനീസിയൻ താരം എലിയസ് സ്കിരി വഴങ്ങിയ സെൽഫ് ഗോൾ നെതർലൻഡ്സിന് അപ്രതീക്ഷിത മുൻതൂക്കം നൽകി. വെറും നാല് മിനിറ്റിനുള്ളിൽ, ഏഴാം മിനിറ്റിൽ ബ്രയാൻ ബ്രോബിയിലൂടെ അവർ ലീഡ് രണ്ടാക്കി ഉയർത്തി. വിർജിൽ വാൻ ഡൈക്കിന്റെ ഹെഡ്ഡറിൽ നിന്നാണ് ബ്രോബി ഗോൾ കണ്ടെത്തിയത്. ഇതോടെ മത്സരം ഏകപക്ഷീയമാകുമെന്ന് തോന്നിച്ചെങ്കിലും തുനീസിയൻ പ്രതിരോധം പിന്നീട് പിടിച്ചുനിന്നു.
രണ്ടാം പകുതിയിൽ തിരിച്ചുവരാൻ ശ്രമിച്ച തുനീസിയ 54-ാം മിനിറ്റിൽ ഹസെം മസ്തൗരിയിലൂടെ ഒരു ഗോൾ മടക്കി. ഹാനിബാൾ മെജ്ബ്രി എടുത്ത കോർണറിൽ നിന്നായിരുന്നു ഈ ഗോൾ. എന്നാൽ, 62-ാം മിനിറ്റിൽ ജാൻ പോൾ വാൻ ഹെക്ക് നേടിയ ഗോളിലൂടെ നെതർലൻഡ്സ് തങ്ങളുടെ ആധിപത്യം വീണ്ടും ഉറപ്പിച്ചു. ടിജാനി റെയ്ൻഡേഴ്സിന്റെ കോർണറിൽ നിന്നാണ് ഈ ഗോൾ പിറന്നത്.
ഗ്രൂപ്പ് ഘട്ടത്തിലെ മൂന്ന് മത്സരങ്ങളും പരാജയപ്പെട്ടാണ് തുനീസിയ ടൂർണമെന്റിൽ നിന്ന് മടങ്ങുന്നത്. അതേസമയം, ഏഴ് പോയിന്റോടെ ഗ്രൂപ്പിൽ ഒന്നാമതെത്തിയ നെതർലൻഡ്സ്, റൗണ്ട് ഓഫ് 32-ൽ മൊറോക്കോയെ നേരിടും. മൊൺട്രെയിൽ വെച്ചാണ് ഈ നിർണായക മത്സരം നടക്കുക.
ബ്രസീലിനെപ്പോലൊരു കരുത്തരായ എതിരാളിയെ നോക്കൗട്ട് റൗണ്ടിൽ ഒഴിവാക്കാൻ സാധിച്ചതിൽ ആശ്വാസമുണ്ടെന്ന് ഡച്ച് പരിശീലകൻ റൊണാൾഡ് കോമാൻ മത്സരശേഷം പ്രതികരിച്ചു. അടുത്ത മത്സരത്തിൽ മൊറോക്കോയ്ക്കെതിരെ ജാഗ്രതയോടെയായിരിക്കും തങ്ങൾ കളിക്കുക എന്നും അദ്ദേഹം കൂട്ടിച്ചേർത്തു. ലോകകപ്പിലെ മികച്ച പ്രകടനത്തിലൂടെ നെതർലൻഡ്സ് തങ്ങളുടെ കരുത്ത് വീണ്ടും തെളിയിച്ചിരിക്കുകയാണ്.
