തിരുവനന്തപുരം കല്ലമ്പലത്ത് കാണാതായ മെഡിക്കൽ വിദ്യാർത്ഥിയെ കാറിനുള്ളിൽ മരിച്ച നിലയിൽ കണ്ടെത്തി. കിളിമാനൂർ തട്ടത്തുമല സ്വദേശിയായ ആഷിക് (23) ആണ് ദുരൂഹ സാഹചര്യത്തിൽ മരണപ്പെട്ടത്. ആലപ്പുഴ മെഡിക്കൽ കോളേജിലെ അവസാന വർഷ എം.ബി.ബി.എസ് വിദ്യാർത്ഥിയാണ് ആഷിക്.
ഇന്നലെ രാത്രിയോടെയാണ് കല്ലമ്പലം പൊലീസ് നടത്തിയ പരിശോധനയിൽ ദേശീയപാതയോട് ചേർന്നുള്ള സർവീസ് റോഡിൽ നിർത്തിയിട്ടിരുന്ന കാറിനുള്ളിൽ അദ്ദേഹത്തെ അബോധാവസ്ഥയിൽ കണ്ടെത്തിയത്.
കഴിഞ്ഞ രണ്ടു ദിവസമായി ആഷിക്കിനെ കാണാനില്ലെന്ന് കാട്ടി ബന്ധുക്കൾ പൊലീസിൽ പരാതി നൽകിയിരുന്നു. ഇതിന്റെ അടിസ്ഥാനത്തിൽ ഊർജിതമായ അന്വേഷണം നടക്കുന്നതിനിടയിലാണ് നിർമാണ പ്രവർത്തനങ്ങൾ നടക്കുന്ന ദേശീയപാതയുടെ ഭാഗത്ത് കാറും അതിനുള്ളിൽ ആഷിക്കിനെയും കണ്ടെത്തിയത്.
വാഹനത്തിനുള്ളിൽ ചാർക്കോൾ പോലുള്ള എന്തോ വസ്തു കത്തിച്ച നിലയിലായിരുന്നുവെന്ന് പൊലീസ് വ്യക്തമാക്കി. അബോധാവസ്ഥയിലായ വിദ്യാർത്ഥിയെ ഉടൻ തന്നെ പാരിപ്പള്ളി മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ കല്ലമ്പലം പൊലീസ് മേൽനടപടികൾ സ്വീകരിച്ചിട്ടുണ്ട്. മൃതദേഹം പാരിപ്പള്ളി മെഡിക്കൽ കോളേജ് മോർച്ചറിയിലേക്ക് മാറ്റി. മരണകാരണത്തെക്കുറിച്ചും മറ്റ് ദുരൂഹതകളെക്കുറിച്ചും പൊലീസ് സമഗ്രമായ അന്വേഷണം ആരംഭിച്ചിട്ടുണ്ട്.
