കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജിക്ക് പിന്നാലെ, പരീക്ഷാ തട്ടിപ്പുകൾക്ക് ഇരയായി ജീവനൊടുക്കിയ കുട്ടികളുടെ ചിത്രങ്ങൾ ഉയർത്തിക്കാട്ടി കോക്രോച്ച് ജനതാ പാർട്ടി (CJP) സ്ഥാപകൻ അഭിജിത് ദീപ്കെ. ഡൽഹി ജന്ദർമന്തറിൽ 35 ദിവസമായി തുടർന്ന പ്രതിഷേധ സമരത്തിനൊടുവിലാണ് ഈ സുപ്രധാന രാഷ്ട്രീയ നീക്കം. രാജ്യത്തെ പരീക്ഷാ മാഫിയകളുടെ ചൂഷണത്തിൽ പൊലിഞ്ഞുപോയ വിദ്യാർത്ഥികൾക്ക് ലഭിച്ച നീതിയായാണ് ഈ വിജയത്തെ അദ്ദേഹം വിശേഷിപ്പിച്ചത്.
മന്ത്രിയുടെ രാജി പ്രഖ്യാപനത്തിന് പിന്നാലെ വികാരാധീനനായി പ്രതികരിച്ച അഭിജിത് ദീപ്കെ, ഈ വിജയം പൂർണ്ണമായും ജീവനൊടുക്കിയ വിദ്യാർത്ഥികൾക്ക് സമർപ്പിക്കുന്നതായി പ്രഖ്യാപിച്ചു. സമരവേദിയിൽ കുട്ടികളുടെ ചിത്രങ്ങൾക്ക് മുന്നിൽ ആദരാഞ്ജലി അർപ്പിച്ച അദ്ദേഹം, കോടിക്കണക്കിന് യുവജനങ്ങളുടെ കണ്ണീരിനും പോരാട്ടത്തിനുമുള്ള ഫലമാണിതെന്ന് വ്യക്തമാക്കി. ഏകാധിപത്യ പ്രവണതകൾക്കെതിരായ ജനാധിപത്യത്തിന്റെയും ഭരണഘടനയുടെയും വിജയമാണിതെന്നും അദ്ദേഹം പറഞ്ഞു.
ധർമ്മേന്ദ്ര പ്രധാന്റെ രാജി കൊണ്ട് മാത്രം സമരം അവസാനിക്കില്ലെന്നും CJP മുന്നറിയിപ്പ് നൽകുന്നുണ്ട്. പരീക്ഷാ ചൂടിൽ ജീവൻ നഷ്ടപ്പെട്ട വിദ്യാർത്ഥികളുടെ കുടുംബങ്ങൾക്ക് ഒരു കോടി രൂപ വീതം നഷ്ടപരിഹാരം നൽകുക, പ്രതിഷേധ സമരങ്ങളുടെ ഭാഗമായി എടുത്ത മുഴുവൻ കേസുകളും പിൻവലിക്കുക, വിദ്യാർത്ഥികൾക്ക് എതിരെയുള്ള പ്രതികാര നടപടികൾ അവസാനിപ്പിക്കുക തുടങ്ങിയ ആവശ്യങ്ങളും സംഘടന ഉന്നയിച്ചിട്ടുണ്ട്. രാജ്യവ്യാപകമായി വിദ്യാർത്ഥി സമൂഹം നടത്തിയ ഐതിഹാസിക പോരാട്ടത്തിന്റെ അലയൊലികളാണ് ഈ രാജിയിലൂടെ യാഥാർത്ഥ്യമായത്.
