തലസ്ഥാന നഗരിയെ ഞെട്ടിച്ച ചാലയിലെ വൻ സ്വർണക്കവർച്ചാ കേസിൽ പ്രതികൾക്കായി അന്വേഷണം തമിഴ്‌നാട്ടിലേക്കും വ്യാപിപ്പിച്ചു. വൈഷ്ണവി ജ്വല്ലറി ഉടമ നന്ദകുമാറിൽ നിന്ന് സ്വർണം കവർന്ന സംഭവത്തിന് പിന്നിൽ കടയെക്കുറിച്ചും അദ്ദേഹത്തിന്റെ ദിനചര്യകളെക്കുറിച്ചും വ്യക്തമായി അറിയുന്നവരുടെ പങ്കുണ്ടെന്നാണ് പൊലീസിന്റെ ശക്തമായ നിഗമനം. വ്യാഴാഴ്ച രാത്രി പത്തരയോടെ കടയടച്ച് പതിവിലും വൈകി നന്ദകുമാർ പുറത്തേക്ക് ഇറങ്ങിയ കൃത്യമായ വിവരം ആരോ ഫോണിലൂടെ കവർച്ചാസംഘത്തിന് കൈമാറിയതായി അന്വേഷണസംഘം സംശയിക്കുന്നു. പ്രതികൾ എത്തിയ ഹോണ്ട സിബി 350, ബുള്ളറ്റ് ബൈക്കുകൾ കേന്ദ്രീകരിച്ചും നഗരത്തിലെ സിസിടിവി ദൃശ്യങ്ങൾ പരിശോധിച്ചും ഫോർട്ട് പൊലീസും ഷാഡോ പൊലീസും അന്വേഷണം ഊർജിതമാക്കിയിരിക്കുകയാണ്.
വ്യാഴാഴ്ച വൈകിട്ട് ഏഴരയോടെ തന്നെ രണ്ടംഗ സംഘം തിരുവനന്തപുരം കിള്ളിപ്പാലത്ത് എത്തിയിരുന്നതായും രാത്രി ഒൻപതോടെ ജ്വല്ലറി സ്ഥിതി ചെയ്യുന്ന മരക്കട ഭാഗത്തെത്തി ഒരു മണിക്കൂറോളം ബൈക്കിൽ കറങ്ങി പരിസരം നിരീക്ഷിച്ചതായും ഇന്ന് പുറത്തുവന്ന അന്വേഷണ വിവരങ്ങൾ വ്യക്തമാക്കുന്നു. സാധാരണയായി മകനൊപ്പമാണ് നന്ദകുമാർ വീട്ടിലേക്ക് മടങ്ങാറുള്ളതെങ്കിലും കവർച്ച നടന്ന ദിവസം അദ്ദേഹം ഒറ്റയ്ക്കായിരുന്നു സഞ്ചരിച്ചിരുന്നത്. മധുരയിൽ നടന്ന വൻ സ്വർണക്കവർച്ചയ്ക്ക് തൊട്ടുപിന്നാലെ സമാനമായ രീതിയിൽ തിരുവനന്തപുരത്തും മോഷണം നടന്നതോടെ തമിഴ്‌നാട് കേന്ദ്രീകരിച്ചുള്ള തിരുട്ടുസംഘമാണോ ഇതിന് പിന്നിലെന്നും പൊലീസ് പരിശോധിക്കുന്നുണ്ട്. പ്രതികൾ തമ്പാനൂർ ഗാന്ധാരി അമ്മൻ കോവിൽ പരിസരം വരെ എത്തിയതിന്റെ ദൃശ്യങ്ങൾ പൊലീസിന് ലഭിച്ചിട്ടുണ്ടെങ്കിലും വാഹനങ്ങളുടെ നമ്പർ വ്യക്തമല്ലാത്തത് വെല്ലുവിളിയാകുന്നുണ്ട്.
അതേസമയം, നഷ്ടപ്പെട്ട സ്വർണത്തിന്റെ അളവിനെച്ചൊല്ലി ഉടമ നൽകിയ മൊഴികളിൽ വൈരുദ്ധ്യം തുടരുന്നത് കേസിൽ ദുരൂഹത വർധിപ്പിക്കുന്നു. കവർച്ച നടന്നയുടൻ രണ്ട് കിലോ (ഏകദേശം 250 പവൻ) സ്വർണം നഷ്ടപ്പെട്ടുവെന്ന് പൊലീസിനോട് പറഞ്ഞ നന്ദകുമാർ, ഇന്നലെ രാവിലെ മാധ്യമങ്ങളോട് സംസാരിക്കവെ 15 പവൻ സ്വർണം മാത്രമാണ് നഷ്ടമായതെന്ന് നിലപാട് മാറ്റിയിരുന്നു. ചെറുകിട ജ്വല്ലറികളിൽ നിന്ന് ശുദ്ധീകരിക്കാൻ നൽകിയ പഴയ സ്വർണമാണ് ബാഗിലുണ്ടായിരുന്നതെന്നാണ് വിശദീകരണം. സംഭവവുമായി ബന്ധപ്പെട്ട് ജ്വല്ലറിയിലെ ജീവനക്കാർ, മുൻ ജീവനക്കാർ, സ്വർണം എത്തിച്ചുനൽകുന്ന ഏജന്റുമാർ എന്നിവരുൾപ്പെടെ പത്തോളം പേരെ പൊലീസ് ഇതിനകം ചോദ്യം ചെയ്തു കഴിഞ്ഞു. കൃത്യമായ ആസൂത്രണത്തോടെ നടന്ന കവർച്ചയിലെ പ്രതികളെ ഉടൻ വലയിലാക്കാനാകുമെന്ന പ്രതീക്ഷയിലാണ് അന്വേഷണസംഘം.
