അർജന്റീന ഫുട്ബോൾ താരം ലയണൽ മെസ്സിയുടെയും ടീമിന്റെയും കേരള സന്ദർശനവുമായി ബന്ധപ്പെട്ട സ്‌പോൺസർഷിപ്പ് തട്ടിപ്പ് കേസിൽ റിപ്പോർട്ടർ ടിവി മാനേജിങ് എഡിറ്റർ ആന്റോ അഗസ്റ്റിനെതിരെ എൻഫോഴ്‌സ്‌മെന്റ് ഡയറക്‌ടറേറ്റ് (ഇ.ഡി) കള്ളപ്പണം വെളുപ്പിക്കൽ നിരോധന നിയമപ്രകാരം (PMLA) കേസ് രജിസ്റ്റർ ചെയ്തു. അന്വേഷണം ഊർജ്ജിതമാക്കിയ ഏജൻസി ആന്റോ അഗസ്റ്റിനും റിപ്പോർട്ടർ ബ്രോഡ്കാസ്റ്റിംഗ് കമ്പനിക്കുമെതിരെ തുടർനടപടികളിലേക്ക് കടന്നിരിക്കുകയാണ്.
സംസ്ഥാന പോലീസിന്റെ പ്രത്യേക അന്വേഷണ സംഘം (SIT) നേരത്തെ രജിസ്റ്റർ ചെയ്ത എഫ്.ഐ.ആറിന്റെയും അന്വേഷണ റിപ്പോർട്ടുകളുടെയും അടിസ്ഥാനത്തിലാണ് കേന്ദ്ര അന്വേഷണ ഏജൻസിയായ ഇ.ഡി ഇ-ഡിആർ (Enforcement Case Information Report) തയ്യാറാക്കി നിയമനടപടികൾ ആരംഭിച്ചത്. കായിക വകുപ്പിനെയും സർക്കാരിനെയും തെറ്റിദ്ധരിപ്പിച്ച് കോടികളുടെ ഫണ്ട് വകമാറ്റാനും വ്യാജരേഖകൾ നിർമ്മിച്ച് സാമ്പത്തിക തട്ടിപ്പ് നടത്താനും ശ്രമിച്ചെന്നാണ് പ്രധാന ആരോപണം.
കേസിൽ ആന്റോ അഗസ്റ്റിൻ ഒന്നാം പ്രതിയും റിപ്പോർട്ടർ ബ്രോഡ്കാസ്റ്റിങ് കമ്പനി രണ്ടാം പ്രതിയുമാണ്. ഈ വിഷയത്തിൽ കോടതികളിൽ പ്രതികൾ സമർപ്പിച്ച ജാമ്യഹർജികളും തള്ളിയിരുന്നു. മെസ്സിയുടെ മത്സരവും സന്ദർശനവും സംഘടിപ്പിക്കുന്നതിനായി കോർപ്പറേറ്റ് സാമൂഹിക ഉത്തരവാദിത്ത (CSR) ഫണ്ടുകളും വൻകിട സ്പോൺസർഷിപ്പുകളും വാഗ്ദാനം ചെയ്ത് വിദേശ അക്കൗണ്ടുകൾ വഴിയടക്കം വലിയ തുകകളുടെ സാമ്പത്തിക ഇടപാടുകൾ നടത്തിയെന്ന വിവരത്തിലാണ് ഇ.ഡി സമാന്തര അന്വേഷണം നടത്തുന്നത്.
കഴിഞ്ഞ ദിവസങ്ങളിൽ പൊലീസിന്റെ പ്രത്യേക അന്വേഷണ സംഘം ആന്റോ അഗസ്റ്റിന്റെ കൊച്ചിയിലെ ഓഫിസിലും വസതിയിലും നടത്തിയ റെയ്ഡിൽ സുപ്രധാന രേഖകളും ഡിജിറ്റൽ തെളിവുകളും കസ്റ്റഡിയിലെടുത്തിരുന്നു. വ്യാജ കരാറുകൾ ഉണ്ടാക്കൽ, ക്രിമിനൽ ഗൂഢാലോചന, വഞ്ചന തുടങ്ങിയ ഗുരുതരമായ കുറ്റകൃത്യങ്ങളുടെ പശ്ചാത്തലത്തിൽ വരും ദിവസങ്ങളിൽ ആന്റോ അഗസ്റ്റിനെ ഇ.ഡി വിശദമായി ചോദ്യം ചെയ്യും. തട്ടിപ്പിലൂടെ സമ്പാദിച്ച സ്വത്തുക്കൾ കണ്ടുകെട്ടൽ അടക്കമുള്ള നടപടികളിലേക്ക് ഏജൻസി കടക്കുമെന്നാണ് ലഭിക്കുന്ന വിവരങ്ങൾ.
