രാജ്യത്തെ മുഖ്യ തെരഞ്ഞെടുപ്പ് കമ്മീഷണർ (CEC) ഗ്യാനേഷ് കുമാറിനെതിരെ ഗുരുതരമായ അഴിമതി ആരോപണത്തിൽ വിജിലൻസ് പ്രാഥമിക അന്വേഷണം നടത്താൻ സംസ്ഥാന സർക്കാർ നിർദേശം നൽകി. മുൻപ് കേരളത്തിൽ പൊതുമരാമത്ത് (PWD) വകുപ്പ് സെക്രട്ടറിയായി സേവനമനുഷ്ഠിക്കവെ, ബില്ലുകൾ പാസാക്കുന്നതിനായി രണ്ട് കോടി രൂപ കൈക്കൂലി ആവശ്യപ്പെട്ടെന്ന പുതിയ പരാതിയിലാണ് ആഭ്യന്തര വകുപ്പിന്റെ ഈ നിർണായക നടപടി.
കെ.എസ്.ടി.പി പദ്ധതിയിലെ കൈക്കൂലി ആരോപണം
വർഷങ്ങൾക്ക് മുൻപ് കേരള സംസ്ഥാന ട്രാൻസ്പോർട്ട് പ്രോജക്ടിന് (KSTP) കീഴിൽ നടന്ന എം.സി റോഡ് നിർമാണവുമായി ബന്ധപ്പെട്ടാണ് കേസിനാസ്പദമായ സംഭവം. അന്നത്തെ പദ്ധതി കരാറുകാരായ മലേഷ്യൻ കമ്പനി പതിബെൽ കൺസോർഷ്യത്തിന് അനുവദിക്കേണ്ട നിർമാണ ബില്ലുകൾ മാറുന്നതിനായി ഗ്യാനേഷ് കുമാർ രണ്ട് കോടി രൂപ കൈക്കൂലി ആവശ്യപ്പെട്ടു എന്നാണ് ആരോപണം. പതിബെൽ കമ്പനിയുടെ പ്രോജക്ട് എഞ്ചിനീയറായിരുന്ന ലീ സീ ബെൻ പിന്നീട് മനോവിഷമത്തെ തുടർന്ന് ജീവനൊടുക്കിയിരുന്നു. ലീ സീ ബെന്നിന്റെ സുഹൃത്തും ചടയമംഗലം സ്വദേശിയുമായ സാജൻ വിജിലൻസ് ഡയറക്ടർക്ക് നൽകിയ പുതിയ പരാതിയിലാണ് ഇന്ന് ആഭ്യന്തര വകുപ്പ് പരിശോധനയ്ക്കും അന്വേഷണത്തിനും നിർദേശം നൽകിയത്.
അന്വേഷണം പുനരാരംഭിക്കാൻ ആഭ്യന്തര വകുപ്പ് ഉത്തരവ്
മുൻപ് വിജിലൻസ് അന്വേഷിച്ച് തെളിവുകളില്ലെന്ന് കണ്ടെത്തി അവസാനിപ്പിച്ച കേസാണിത്. എന്നാൽ, ലീ സീ ബെൻ ജീവിച്ചിരുന്നപ്പോൾ നൽകിയ വിവരങ്ങളെയും നിലവിലെ വെളിപ്പെടുത്തലുകളെയും ആസ്പദമാക്കി ലഭിച്ച നിയമോപദേശത്തിന്റെ അടിസ്ഥാനത്തിലാണ് കേസിൽ വീണ്ടും പ്രാഥമിക പരിശോധന നടത്താൻ സംസ്ഥാന സർക്കാർ തീരുമാനിച്ചത്. വിജിലൻസ് സമർപ്പിക്കുന്ന പ്രാഥമിക അന്വേഷണ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ സ്വീകരിക്കുക. അതേസമയം, ആരോപണത്തിൽ ഗ്യാനേഷ് കുമാർ ഇതുവരെ പ്രതികരിച്ചിട്ടില്ല.
