കൂട്ടുകാരുമൊത്ത് ഫുട്ബോൾ ടർഫിൽ കളിക്കുന്നതിനിടെ പ്ലസ് വൺ വിദ്യാർത്ഥി കുഴഞ്ഞുവീണു മരിച്ചു. ശ്രീകൃഷ്ണപുരം തോട്ടര കോട്ടയിൽ രാജൻ – ദീപ ദമ്പതികളുടെ മകൻ ദിൽരാജ് (16) ആണ് ദാരുണമായി മരണപ്പെട്ടത്. ഇന്നലെ രാത്രി പത്ത് മണിയോടെ കരിമ്പുഴയിലെ ടർഫിലായിരുന്നു സംഭവം.
പതിവ് പോലെ സുഹൃത്തുക്കൾക്കൊപ്പം ടർഫിൽ കളിക്കാനെത്തിയതായിരുന്നു ദിൽരാജ്. കളി തുടങ്ങി വെറും അഞ്ച് മിനിറ്റിനുള്ളിൽ കുട്ടി ടർഫിൽ കുഴഞ്ഞുവീഴുകയായിരുന്നു. ആദ്യം കാൽ തട്ടി വീണതാണെന്നാണ് കൂടെയുള്ളവർ കരുതിയത്. എന്നാൽ മുഖത്ത് വെള്ളം തളിച്ചിട്ടും ബോധം തെളിയാതിരുന്നതിനെ തുടർന്ന് ഉടൻ തന്നെ അടുത്തുള്ള ആശുപത്രിയിലും പിന്നീട് മാങ്ങോട് മെഡിക്കൽ കോളേജിലും എത്തിച്ചെങ്കിലും ജീവൻ രക്ഷിക്കാനായില്ല.
കെ.എച്ച്.എസ് തോട്ടരയിലെ പ്ലസ് വൺ വിദ്യാർത്ഥിയാണ് ദിൽരാജ്. കളിമൈതാനത്ത് ചിരിച്ചുകളിച്ചു നിന്ന പ്രിയ കൂട്ടുകാരന്റെ പെട്ടെന്നുള്ള വേർപാടിന്റെ ഞെട്ടലിലാണ് സഹപാഠികളും നാട്ടുകാരും. കളിയിടങ്ങളിൽ ചെറുപ്പക്കാരുടെയും വിദ്യാർത്ഥികളുടെയും ഇടയിൽ ഇത്തരം ആരോഗ്യപ്രശ്നങ്ങളും കുഴഞ്ഞുവീണുള്ള മരണങ്ങളും ആവർത്തിക്കപ്പെടുന്നത് വലിയ ആശങ്കയാണ് സൃഷ്ടിക്കുന്നത്.
കളിക്കളങ്ങളിൽ ഇത്തരം ദുരന്തങ്ങൾ ആവർത്തിക്കാതിരിക്കാൻ യുവതലമുറയുടെ ആരോഗ്യസ്ഥിതിയും ശാരീരിക ബുദ്ധിമുട്ടുകളും ഗൗരവമായി പരിശോധിക്കപ്പെടേണ്ടതുണ്ട് എന്ന ഓർമ്മപ്പെടുത്തലാണ് ഈ വേർപാട്.
