കുഞ്ഞുങ്ങളുടെ പോഷകാഹാര ഉത്പന്നങ്ങളുടെ പരസ്യങ്ങളിലും ലേബലുകളിലും തെറ്റായ അവകാശവാദങ്ങൾ ഉന്നയിച്ചതുമായി ബന്ധപ്പെട്ട് പ്രമുഖ ഭക്ഷ്യ ഉത്പാദന കമ്പനിയായ നെസ്ലെ ഇന്ത്യയ്ക്കെതിരെ (Nestle India) ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) ഇന്ന് കർശന നിയമനടപടി സ്വീകരിച്ചു. ഇന്നലെ പുറത്തുവന്ന റിപ്പോർട്ടുകളുടെ തുടർച്ചയായി, ഇന്ന് ഔദ്യോഗികമായി കമ്പനിക്കെതിരെ അജ്ജഡിക്കേഷൻ കേസുകൾ രജിസ്റ്റർ ചെയ്യുകയായിരുന്നു.
കുട്ടികളുടെ ഭക്ഷണവുമായി ബന്ധപ്പെട്ട ചട്ടങ്ങൾ ലംഘിച്ചതിനാണ് പ്രധാനമായും നടപടി. നെസ്ലെയുടെ ചില ജനപ്രിയ ശിശു പോഷകാഹാര ഉത്പന്നങ്ങളിൽ അനുവദനീയമല്ലാത്ത രീതിയിലുള്ള പ്രചാരണങ്ങളും ബയോട്ടിൻ (Biotin) പോലുള്ള ഘടകങ്ങളുടെ അളവുകളിലെ പൊരുത്തക്കേടുകളും അധികൃതർ കണ്ടെത്തി. ഫുഡ് സേഫ്റ്റി ആൻഡ് സ്റ്റാൻഡേർഡ്സ് (ശിശു പോഷകാഹാരങ്ങൾക്കായുള്ള ഭക്ഷണങ്ങൾ) ചട്ടങ്ങളുടെ ലംഘനമാണ് കമ്പനിയുടെ ഭാഗത്തുനിന്നും ഉണ്ടായിട്ടുള്ളതെന്ന് FSSAI വ്യക്തമാക്കി.
ശിശുക്കളുടെ ആരോഗ്യത്തെയും പോഷകാഹാര സുരക്ഷയെയും ബാധിക്കുന്ന വിഷയമായതിനാൽ യാതൊരുവിധ വിട്ടുവീഴ്ചയ്ക്കും തയ്യാറല്ലെന്നാണ് റെഗുലേറ്ററി അതോറിറ്റിയുടെ നിലപാട്. മുമ്പും വിപണിയിലെ വിവിധ ഉത്പന്നങ്ങളുടെ തെറ്റായ അവകാശവാദങ്ങൾക്കെതിരെ FSSAI നോട്ടീസ് അയച്ചിരുന്നുവെങ്കിലും, നെസ്ലെയുടെ ശിശു ഉത്പന്നങ്ങളിലെ ഗുരുതരമായ വീഴ്ചകൾ കണ്ടെത്തിയതിനെ തുടർന്നാണ് ഇപ്പോൾ നേരിട്ടുള്ള നിയമനടലികളിലേക്ക് കടന്നിരിക്കുന്നത്.
വിപണിയിൽ ലഭ്യമാകുന്ന കുട്ടികളുടെ ഭക്ഷണ ഉത്പന്നങ്ങളുടെ ഗുണനിലവാരം ഉറപ്പുവരുത്തുന്നതിന്റെ ഭാഗമായി രാജ്യവ്യാപകമായി പരിശോധനകൾ കർശനമാക്കിയിരിക്കുകയാണ്. അതേസമയം, FSSAI-യുടെ പുതിയ നടപടിയോട് നെസ്ലെ ഇന്ത്യ ഔദ്യോഗികമായി പ്രതികരിച്ചിട്ടില്ല. കുഞ്ഞുങ്ങളുടെ ആരോഗ്യവുമായി ബന്ധപ്പെട്ട വിഷയമായതിനാൽ അതോറിറ്റിയുടെ ഈ നീക്കം വിപണിയിൽ വലിയ ചർച്ചയായിട്ടുണ്ട്.
