മലയാള സിനിമയിലെ മുതിർന്ന ഛായാഗ്രാഹകനും എഴുപതിലേറെ ചിത്രങ്ങളുടെ അമരക്കാരനുമായ ടി.എൻ. കൃഷ്ണൻകുട്ടി (96) അന്തരിച്ചു. ആലപ്പുഴ പൂന്തോപ്പ് തൈപ്പറമ്പ് വീട്ടിലായിരുന്നു അന്ത്യം. വാർധക്യസഹജമായ അസുഖങ്ങളെ തുടർന്നാണ് വിയോഗം. അദ്ദേഹത്തിന്റെ സംസ്കാരം ഇന്ന് ഉച്ചയ്ക്ക് രണ്ടിന് ഔദ്യോഗിക ബഹുമതികളോടെ വീട്ടുവളപ്പിൽ നടക്കും.
1960-ൽ ഉദയാ സ്റ്റുഡിയോയുടെ ബാനറിൽ കുഞ്ചാക്കോ സംവിധാനം ചെയ്ത ‘ഉമ്മ’ എന്ന ചിത്രത്തിലൂടെയാണ് ടി.എൻ. കൃഷ്ണൻകുട്ടി സ്വതന്ത്ര ഛായാഗ്രാഹകനായി അരങ്ങേറ്റം കുറിക്കുന്നത്. തുടർന്ന് മലയാള സിനിമയിൽ സജീവമായ അദ്ദേഹം എഴുപതോളം ചിത്രങ്ങൾക്ക് ദൃശ്യഭംഗി പകർന്നു. സംവിധായകൻ ഹരിഹരന്റെ ആദ്യ ചിത്രമായ ‘ലേഡീസ് ഹോസ്റ്റൽ’ ഉൾപ്പെടെ നിരവധി ഹിറ്റ് സിനിമകളുടെ ഛായാഗ്രഹണം നിർവഹിച്ചത് അദ്ദേഹമാണ്. മലയാളത്തിന്റെ മെഗാസ്റ്റാർ മമ്മൂട്ടിയുടെ ആദ്യ സിനിമയായ ‘കടത്തുകാരൻ’ ക്യാമറയിൽ പകർത്താൻ ഭാഗ്യം ലഭിച്ച ഛായാഗ്രാഹകൻ എന്ന പ്രത്യേകതയും അദ്ദേഹത്തിനുണ്ട്.
തിക്കുറിശ്ശി സുകുമാരൻ നായർ, എം.എം. നേശൻ, പി.ജെ. ആന്റണി, ശശികുമാർ, എ.ബി. രാജ്, വേണു, കെ.പി. പിള്ള, കെ. നാരായണൻ തുടങ്ങിയ പ്രമുഖ സംവിധായകരുടെയെല്ലാം സിനിമകളിൽ അദ്ദേഹം പ്രവർത്തിച്ചിട്ടുണ്ട്. 1985-ൽ ജോർജ് വെട്ടം സംവിധാനം ചെയ്ത ‘മടക്കയാത്ര’യാണ് അദ്ദേഹം ഒടുവിൽ ഛായാഗ്രഹണം നിർവഹിച്ച ചിത്രം.
പരേതയായ ലളിതമ്മയാണ് ഭാര്യ. ഹരികൃഷ്ണൻ, ജയകൃഷ്ണൻ, ജ്യോതികൃഷ്ണ എന്നിവരാണ് മക്കൾ. മലയാള സിനിമാ ലോകത്തിന്റെ ആദ്യകാല ചരിത്രത്തിന് ദൃശ്യപരമായി അടിത്തറ പാകിയ പ്രതിഭകളിലൊരാളാണ് ടി.എൻ. കൃഷ്ണൻകുട്ടിയുടെ വേർപാടിലൂടെ മറയുന്നത്.
