ഇന്ന് ചിങ്ങമാസത്തിലെ അഷ്ടമിരോഹിണി നാളിൽ ഭക്തിനിർഭരമായ അന്തരീക്ഷത്തിൽ കേരളം ശ്രീകൃഷ്ണജയന്തി ആഘോഷിക്കുന്നു. ഉണ്ണിക്കണ്ണന്റെ പിറന്നാൾ നിറവിൽ നാടും നഗരവും ഒരുപോലെ കൃഷ്ണശോഭയിലാണ്. ബാലഗോകുലത്തിന്റെ നേതൃത്വത്തിൽ സംസ്ഥാനത്തുടനീളം കുരുന്നുകൾ അണിനിരക്കുന്ന വിപുലമായ ശോഭായാത്രകളും വിവിധ കലാപരിപാടികളും നടക്കുകയാണ്.
തലസ്ഥാന നഗരിയിൽ തിരുവനന്തപുരം മേയർ വി.വി. രാജേഷ് ഉദ്ഘാടനം ചെയ്യുന്ന പാളയം ഗണപതി ക്ഷേത്രത്തിന് മുന്നിൽ നിന്നുള്ള പ്രധാന ശോഭായാത്രയോടെ ആഘോഷങ്ങൾക്ക് ഔദ്യോഗിക തുടക്കമായി. ദ്വാപരയുഗ സ്മരണകളുണർത്തുന്ന നിശ്ചലദൃശ്യങ്ങളും, ശ്രീകൃഷ്ണന്റെയും ഗോപികമാരുടെയും വേഷം ധരിച്ചെത്തിയ കുരുന്നുകളുടെ സാന്നിധ്യവും ശോഭായാത്രകളെ കൂടുതൽ ആകർഷകമാക്കുന്നു. പുല്ലാങ്കുഴൽ നാദങ്ങളും ഭക്തിഗാനങ്ങളും മുഴങ്ങിക്കേൾക്കുന്ന തെരുവുകളിൽ ജനസാഗരമാണ് ഒഴുകിയെത്തിയിരിക്കുന്നത്.
പ്രധാന കൃഷ്ണക്ഷേത്രങ്ങളിലെല്ലാം അതിരാവിലെ മുതൽ പ്രത്യേക പൂജകളും വഴിപാടുകളും നടക്കുന്നുണ്ട്. പ്രശസ്തമായ ഗുരുവായൂർ ശ്രീകൃഷ്ണക്ഷേത്രത്തിൽ പുലർച്ചെ മൂന്ന് മണിക്ക് തന്നെ നട തുറന്നിരുന്നു. നിർമാല്യദർശനവും വാകച്ചാർത്തിനും പുറമെ കാഴ്ചശീവേലിക്ക് സ്വർണക്കോലമെഴുന്നള്ളപ്പും ഭക്തജനങ്ങളെ ആത്മീയ നിർവൃതിയിലാഴ്ത്തി. അമ്പലപ്പുഴ, തിരുവല്ല ശ്രീവല്ലഭ ക്ഷേത്രം തുടങ്ങി സംസ്ഥാനത്തെ മറ്റ് പ്രധാന വൈഷ്ണവ കേന്ദ്രങ്ങളിലും വൻ തിരക്കാണ് അനുഭവപ്പെടുന്നത്.
ധർമ്മത്തിന്റെയും സ്നേഹത്തിന്റെയും സന്ദേശം വിളിച്ചോതുന്ന ശ്രീകൃഷ്ണചരിതം ഓർമിപ്പിച്ചുകൊണ്ട് വീടുകളിലും അമ്പലങ്ങളിലും ഉറിയടികളും ജന്മദിനാഘോഷ ചടങ്ങുകളും നടക്കുന്നു. ‘മായ വിട്ടുണരൂ മാനവനായി വളരൂ’ എന്ന സന്ദേശമുയർത്തിയാണ് ഈ വർഷത്തെ ആഘോഷങ്ങൾ. ജാതിമത ഭേദമന്യേ ഏവരും ഒത്തുകൂടുന്ന ഈ ആഘോഷം സമൂഹത്തിൽ സ്നേഹവും സാഹോദര്യവും വളർത്താൻ പ്രചോദനമാകുന്നു.
