വനിതാ ട്വന്റി20 അന്താരാഷ്ട്ര ക്രിക്കറ്റ് ചരിത്രത്തിൽ പുതിയ ലോക റെക്കോർഡ് സ്വന്തമാക്കി ഇന്ത്യയുടെ സ്റ്റാർ ഓൾറൗണ്ടർ ദീപ്തി ശർമ്മ. രാജ്യാന്തര ടി20 ക്രിക്കറ്റിൽ ഏറ്റവും കൂടുതൽ വിക്കറ്റുകൾ വീഴ്ത്തുന്ന ബൗളറെന്ന നേട്ടമാണ് ഈ പ്രമുഖ ഇന്ത്യൻ താരം സ്വന്തമാക്കിയത്.
ദുബായിൽ നടന്ന വനിതാ ഏഷ്യ കപ്പ് ക്രിക്കറ്റ് ടൂർണമെന്റിൽ തായ്ലൻഡിനെതിരെയുള്ള മത്സരത്തിലാണ് ദീപ്തി ഈ ചരിത്രനേട്ടം കൈവരിച്ചത്. ഇന്നലെ നടന്ന ഈ മത്സരത്തിൽ തകർപ്പൻ ബോളിങ് പ്രകടനമാണ് താരം പുറത്തെടുത്തത്. തന്റെ കരിയറിലെ 150-ാം ടി20 മത്സരത്തിനിറങ്ങിയ ദീപ്തി, വെറും 7 പന്തുകൾ മാത്രം എറിഞ്ഞ് റണ്ണൊന്നും വഴങ്ങാതെ 3 വിക്കറ്റുകളാണ് വീഴ്ത്തിയത്. ഈ പ്രകടനത്തോടെ ടി20 ഫോർമാറ്റിലെ ആകെ വിക്കറ്റ് നേട്ടം 171 ആയി ഉയർത്താൻ താരത്തിന് സാധിച്ചു.
തായ്ലൻഡിന്റെ തിപത്ച പുത്തവോങ്ങിന്റെ റെക്കോർഡാണ് ദീപ്തി പിന്നിലാക്കിയത് (170 വിക്കറ്റുകൾ). ഇതോടെ വനിതാ ടി20 അന്താരാഷ്ട്ര ക്രിക്കറ്റിൽ ഏറ്റവും കൂടുതൽ വിക്കറ്റുകൾ വീഴ്ത്തുന്ന ലോകത്തെ ഒന്നാമത്തെ ബോറളായി ദീപ്തി ശർമ്മ മാറി. കൂടാതെ, വനിതാ ടി20 ക്രിക്കറ്റിൽ റണ്ണൊന്നും വഴങ്ങാതെ മൂന്നോ അതിലധികമോ വിക്കറ്റ് നേടുന്ന ആദ്യ ഇന്ത്യൻ ബൗളർ എന്ന അപൂർവ്വ നേട്ടവും ഈ ഇരുപത്തിയെട്ടുകാരി സ്വന്തം പേരിൽ കുറിച്ചു.
തന്റെ കരിയറിലെ നാഴികക്കല്ലായ 150-ാം മത്സരത്തിൽ തന്നെ ലോക റെക്കോർഡ് കുറിക്കാൻ കഴിഞ്ഞത് ഇന്ത്യൻ ക്രിക്കറ്റിനും അഭിമാനകരമായ മുഹൂർത്തമായി മാറി. മത്സരത്തിൽ ഇന്ത്യ 94 റൺസിന്റെ കൂറ്റൻ വിജയം സ്വന്തമാക്കുകയും ചെയ്തു. ലോകോത്തര പ്രകടനങ്ങളിലൂടെ ഇന്ത്യൻ വനിതാ ക്രിക്കറ്റിന്റെ കുന്തമുനയായി മാറിയിരിക്കുകയാണ് ദീപ്തി ശർമ്മ ഇപ്പോൾ.
