ലയണൽ മെസിയും അർജന്റീന ഫുട്ബോൾ ടീമും കേരളത്തിലേക്ക് എത്തുമെന്ന പ്രഖ്യാപനത്തിന് പിന്നിൽ കോടികളുടെ തട്ടിപ്പ് നടന്നതായി കണ്ടെത്തി. ഇതുസംബന്ധിച്ച നിർണായക അന്വേഷണ റിപ്പോർട്ട് കായിക വകുപ്പ് ഇന്ന് മുഖ്യമന്ത്രിക്ക് ഔദ്യോഗികമായി കൈമാറി. റിപ്പോർട്ടിന് അതീവ രഹസ്യസ്വഭാവമുണ്ടെന്നും കൂടുതൽ ആഴത്തിലുള്ള അന്വേഷണം ആവശ്യമാണെന്നും കായികമന്ത്രി ഒ.ജെ ജനീഷ് വ്യക്തമാക്കി.
അർജന്റീന ടീമിന്റെ സന്ദർശനവുമായി ബന്ധപ്പെട്ട് വൻ തുക സ്പോൺസർമാരിലൂടെ കൈമാറിയെന്ന അവകാശവാദത്തിന് യാതൊരുവിധ ഔദ്യോഗിക രേഖകളുടെയും പിന്തുണയില്ലെന്ന് കായിക വകുപ്പ് സ്പെഷ്യൽ സെക്രട്ടറിയുടെ നേതൃത്വത്തിലുള്ള അന്വേഷണത്തിൽ വ്യക്തമായി. പണം കൈമാറിയതിനോ കൃത്യമായ കരാറുകളിൽ ഒപ്പുവെച്ചതിനോ തെളിവുകളില്ലാത്തത് സംഭവത്തിന് പിന്നിലെ കള്ളക്കളി പുറത്തുകൊണ്ടുവരുന്നു. വിദേശനാണ്യ വിനിമയ ചട്ടങ്ങളുടെ ലംഘനവും കള്ളപ്പണം വെളുപ്പിക്കലും ഇതിലൂടെ നടന്നിട്ടുണ്ടെന്ന ഗുരുതര കണ്ടെത്തലുകളും റിപ്പോർട്ടിലുണ്ട്.
സ്പോൺസർമാരെ തിരഞ്ഞെടുത്തതിലും ഫണ്ട് കൈകാര്യം ചെയ്തതിലും വലിയ ക്രമക്കേടുകളാണ് നടന്നിട്ടുള്ളത്. കായിക പ്രേമികളെയും ആരാധകരെയും ഒരുപോലെ നിരാശരാക്കുന്നതാണ് ഇപ്പോൾ പുറത്തുവരുന്ന വിവരങ്ങൾ. വിഷയത്തിന്റെ ഗൗരവം കണക്കിലെടുത്ത് വിജിലൻസിന്റെയോ മറ്റ് കേന്ദ്ര ഏജൻസികളുടെയോ സമഗ്രമായ അന്വേഷണത്തിന് റിപ്പോർട്ടിൽ ശുപാർശ ചെയ്തിട്ടുണ്ടെന്നാണ് സൂചന. കായിക വകുപ്പിന്റെ റിപ്പോർട്ടിന്റെ അടിസ്ഥാനത്തിൽ സർക്കാർ ഉടൻ തന്നെ കർശനമായ തുടർനടപടികളിലേക്ക് കടക്കുമെന്നാണ് പ്രതീക്ഷിക്കുന്നത്. ഫുട്ബോൾ ആരാധകർക്കിടയിൽ വലിയ ചർച്ചയായി മാറിയിരിക്കുന്ന ഈ സംഭവത്തിൽ സർക്കാർ സ്വീകരിക്കുന്ന അടുത്ത നീക്കം നിർണ്ണായകമാകും.
