വിദ്യാർത്ഥികളിൽ കാർഷിക സംസ്കാരവും പ്രകൃതിയോട് ഇണങ്ങിയുള്ള ജീവിതശൈലിയും വളർത്തിയെടുക്കുന്നതിന്റെ ഭാഗമായി, കൃഷിയിൽ ഏർപ്പെടുന്ന കുട്ടികൾക്ക് പരീക്ഷകളിൽ വെയിറ്റേജ് മാർക്ക് നൽകാൻ കേരള സർക്കാർ ആലോചിക്കുന്നു. തിരുവനന്തപുരത്ത് നടന്ന കൃഷിവകുപ്പ് ഫീൽഡ് ലെവൽ ഓഫീസർമാരുടെ അവലോകന യോഗത്തിൽ കൃഷിമന്ത്രി ടി. സിദ്ദിഖ് ആണ് ഈ നിർണായക പ്രഖ്യാപനം നടത്തിയത്.
ഈ പദ്ധതിയുടെ ഭാഗമായി സംസ്ഥാനത്തെ എല്ലാ സ്കൂളുകളിലും ‘കതിർ ക്ലബ്ബുകൾ’ ആരംഭിക്കും. ഇതിലൂടെ വിദ്യാർത്ഥികൾക്ക് പാഠ്യപദ്ധതിയുടെ ഭാഗമായി കൃഷിയെക്കുറിച്ച് സൈദ്ധാന്തികമായ അറിവുകൾ നൽകുന്നതിനൊപ്പം പ്രായോഗിക പരിശീലനവും ഉറപ്പാക്കും. സ്കൂൾ തലത്തിൽ കൃഷി പ്രവർത്തനങ്ങളിൽ സജീവമായി പങ്കെടുക്കുന്ന കുട്ടികൾക്കാണ് പരീക്ഷകളിൽ അധിക വെയിറ്റേജ് മാർക്കുകൾ പരിഗണിക്കുന്നത്.
പൊതുവിദ്യാഭ്യാസ വകുപ്പുമായി കൂടിയാലോചിച്ച് ഇതിനുള്ള സമഗ്രമായ മാർഗരേഖ ഉടൻ തയ്യാറാക്കുമെന്ന് മന്ത്രി ടി. സിദ്ദിഖ് വ്യക്തമാക്കി. കതിർ ക്ലബ്ബുകളുടെ പ്രവർത്തനങ്ങൾക്ക് തദ്ദേശ സ്ഥാപനങ്ങളുടെ പ്രതിനിധികളും പ്രമുഖ കർഷകരും അടങ്ങുന്ന പ്രത്യേക ബാക്കപ്പ് കമ്മിറ്റികൾ മേൽനോട്ടം വഹിക്കും.
കൂടാതെ, കാർഷിക മേഖലയെ കൂടുതൽ ജനകീയവും ആധുനികവുമാക്കുന്നതിന്റെ ഭാഗമായി കൃഷിവകുപ്പിന്റെ മുഴുവൻ സേവനങ്ങളും ഡിജിറ്റലൈസ് ചെയ്തുകൊണ്ട് ‘കതിർ ആപ്പ്’ എന്ന പുതിയ മൊബൈൽ ആപ്ലിക്കേഷനും സർക്കാർ അവതരിപ്പിക്കുന്നുണ്ട്. കാലാവസ്ഥാ വ്യതിയാനങ്ങളെയും വിപണി മാറ്റങ്ങളെയും അതിജീവിച്ച് സംസ്ഥാനത്ത് കാർഷിക രംഗത്ത് രണ്ടാം ഭൂവിപ്ലവത്തിന് തുടക്കം കുറിക്കുകയാണ് ഈ പദ്ധതികളുടെയെല്ലാം പ്രധാന ലക്ഷ്യം. സ്കൂൾ തലം മുതൽ തന്നെ വിദ്യാർത്ഥികളെ ഉൽപ്പാദനപരമായ കാര്യങ്ങളിൽ പങ്കാളികളാക്കുന്നത് ഭാവിയിൽ കേരളത്തിന്റെ ഭക്ഷ്യസുരക്ഷയ്ക്കും വലിയ മുതൽക്കൂട്ടാകും.
