സംസ്ഥാനത്തെ സെൻട്രൽ ജയിലുകളിൽ സുരക്ഷാ വകുപ്പിന്റെ നേതൃത്വത്തിൽ നടന്ന വ്യാപകമായ മിന്നൽ പരിശോധനയിൽ തിരുവനന്തപുരം പൂജപ്പുര സെൻട്രൽ ജയിലിൽ നിന്നും കഞ്ചാവ് പൊതികളും മാരകായുധങ്ങളും കണ്ടെടുത്തു. സംസ്ഥാന വ്യാപകമായി കുറ്റകൃത്യങ്ങൾ തടയുന്നതിന്റെ ഭാഗമായി നടപ്പിലാക്കിയ ‘ഓപ്പറേഷൻ തൂഫാൻ’ എന്ന പ്രത്യേക പദ്ധതിയുടെ ഭാഗമായാണ് ജയിലുകളിൽ കർശന പരിശോധനകൾ ആരംഭിച്ചത്.
തിരുവനന്തപുരം, കണ്ണൂർ, വിയ്യൂർ, തവനൂർ തുടങ്ങിയ പ്രധാന സെൻട്രൽ ജയിലുകളിലാണ് ഒരേസമയം ഉന്നത ഉദ്യോഗസ്ഥരുടെ നേതൃത്വത്തിൽ പരിശോധനകൾ നടന്നത്. ഇന്നലെ രാത്രി ആരംഭിച്ച മിന്നൽ പരിശോധന ഇന്ന് പുലർച്ചെയാണ് അവസാനിച്ചത്. ഇതിൽ പൂജപ്പുര, കണ്ണൂർ ജയിലുകളിൽ നിന്നാണ് നിരോധിത ലഹരി വസ്തുക്കൾ ഉൾപ്പെടെയുള്ളവ പിടിച്ചെടുത്തത്.
പൂജപ്പുര സെൻട്രൽ ജയിലിൽ നടത്തിയ വിശദമായ പരിശോധനയിലാണ് തടവുകാർക്കായി ഒളിപ്പിച്ചു വെച്ചിരുന്ന കഞ്ചാവ് പൊതികൾ കണ്ടെത്തിയത്. കഞ്ചാവിന് പുറമെ ജിവിതത്തിൽ ഉപയോഗിക്കാൻ പാടില്ലാത്ത ആയുധങ്ങളും, സിഗരറ്റ് ബണ്ടിലുകളും ഉദ്യോഗസ്ഥർ കണ്ടെടുത്തവയിൽ ഉൾപ്പെടുന്നു. കണ്ണൂർ സെൻട്രൽ ജയിലിൽ നടത്തിയ പരിശോധനയിൽ ഹാഷിഷ് ഓയിലും മൊബൈൽ ചാർജറുകളും ബീഡികളും കണ്ടെത്തിയിട്ടുണ്ട്.
ജയിലുകളിൽ കഴിയുന്ന കുറ്റവാളികളിൽ പലരും ജയിലകത്ത് ഇരുന്ന് പോലും ലഹരി മാഫിയകളുമായി ബന്ധപ്പെടുന്നുണ്ടെന്നും മയക്കുമരുന്ന് കച്ചവടക്കാരായി മാറുന്നുണ്ടെന്നും ഉള്ള വിവരങ്ങളുടെ അടിസ്ഥാനത്തിലാണ് ഈ കർശന നടപടി. സംഭവത്തിൽ ജയിൽ സൂപ്രണ്ട് ടൗൺ പൊലീസിൽ ഔദ്യോഗികമായി പരാതി നൽകിയിട്ടുണ്ട്. ജയിലിനുള്ളിലെ സുരക്ഷാ വീഴ്ചകളെക്കുറിച്ചും ലഹരി വസ്തുക്കൾ അകത്തേക്ക് എത്തിയ വഴികളെക്കുറിച്ചും പൊലീസ് അന്വേഷണം ആരംഭിച്ചിട്ടുണ്ട്. സംസ്ഥാനത്തെ ജയിലുകളിൽ സുരക്ഷ ശക്തമാക്കുന്നതിന്റെ ഭാഗമായി വരും ദിവസങ്ങളിലും പരിശോധനകൾ തുടരുമെന്ന് അധികൃതർ വ്യക്തമാക്കി.
