പ്രധാനമന്ത്രി നരേന്ദ്ര മോദിയുടെ പുതിയ ഇൻസ്റ്റാഗ്രാം റീൽ വീഡിയോയെ പരിഹസിച്ച് ‘കോക്രോച്ച് ജനതാ പാർട്ടി’ (സി.ജെ.പി) സ്ഥാപകൻ അഭിജീത് ദീപ്കെ. പ്രധാനമന്ത്രിയുടെ ചർമത്തിന് രാജ്യത്തിന്റെ ഭാവിയേക്കാൾ തിളക്കമുണ്ടെന്ന രൂക്ഷമായ വിമർശനമാണ് അദ്ദേഹം ഉന്നയിച്ചത്. രാജ്യത്തെ യുവജനങ്ങളുടെ പ്രശ്നങ്ങളും ആശങ്കകളും അവഗണിച്ച് പ്രധാനമന്ത്രി സോഷ്യൽ മീഡിയയിൽ ശ്രദ്ധ കേന്ദ്രീകരിക്കുന്നുവെന്ന ആരോപണത്തിന്റെ ഭാഗമായാണ് ഈ പരിഹാസം.
അടുത്തിടെ രാജ്യത്തെ മത്സര പരീക്ഷകളിലെ ക്രമക്കേടുകൾക്കും തൊഴിലില്ലായ്മയ്ക്കും എതിരെ ഡൽഹി ജന്തർമന്തർ ഉൾപ്പെടെയുള്ള വിവിധയിടങ്ങളിൽ വലിയ പ്രതിഷേധങ്ങളാണ് അരങ്ങേറിയത്. വിദ്യാർഥികളും യുവജനങ്ങളും അണിനിരന്ന ഈ പ്രക്ഷോഭങ്ങൾ ദേശീയതലത്തിൽത്തന്നെ വലിയ ചർച്ചയായിമാറിയിരുന്നു. ഇതിനിടയിലാണ് രാജ്യത്തെ യുവജനങ്ങളെ അഭിസംബോധന ചെയ്തുകൊണ്ട് പ്രധാനമന്ത്രി നരേന്ദ്ര മോദി സോഷ്യൽ മീഡിയയിൽ പുതിയൊരു വീഡിയോ പങ്കുവെച്ചത്.
ഈ പശ്ചാത്തലത്തിലാണ് സി.ജെ.പി സ്ഥാപകനായ അഭിജീത് ദീപ്കെ പ്രധാനമന്ത്രിക്കെതിരെ രംഗത്തെത്തിയത്. രാജ്യത്ത് നിലനിൽക്കുന്ന തൊഴിലില്ലായ്മ, പരീക്ഷാ തട്ടിപ്പുകൾ തുടങ്ങിയ ഗൗരവകരമായ പ്രതിസന്ധികൾ പരിഹരിക്കുന്നതിൽ സർക്കാർ പരാജയപ്പെട്ടുവെന്നും, ജനങ്ങളുടെ യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനാണ് ഇത്തരം പ്രവൃത്തികളെന്നും അദ്ദേഹം കുറ്റപ്പെടുത്തി.
സാമൂഹിക മാധ്യമങ്ങളിലൂടെ സർക്കാരിന്റെ നയങ്ങളെ നിരന്തരം ചോദ്യം ചെയ്യുന്ന അഭിജീത് ദീപ്കെയുടെ ഈ പുതിയ പരാമർശം രാഷ്ട്രീയ വൃത്തങ്ങളിലും സോഷ്യൽ മീഡിയയിലും വലിയ ചർച്ചകൾക്കും അനുകൂല-പ്രതികൂല പ്രതികരണങ്ങൾക്കും വഴിവെച്ചിട്ടുണ്ട്. ഭരണപക്ഷത്തിന്റെ ജനവിരുദ്ധ സമീപനങ്ങൾക്കെതിരെ ശക്തമായ പ്രതിഷേധങ്ങൾ തുടരുമെന്ന് സി.ജെ.പി വ്യക്തമാക്കിയിട്ടുണ്ട്.
