അതിശക്തമായ ഉഷ്ണതരംഗത്തിന്റെ പശ്ചാത്തലത്തിൽ ദക്ഷിണ സ്പെയിനിലെ അൽമേരിയയിൽ ഉണ്ടായ കാട്ടുതീയിൽ 12 പേർക്ക് ദാരുണാന്ത്യം. വ്യാഴാഴ്ച പൊട്ടിപ്പുറപ്പെട്ട തീ അതിവേഗം പടരുകയായിരുന്നു. സ്പെയിനിനെ പിടിച്ചുലച്ച ഈ ദുരന്തത്തിൽ അൻഡാലൂഷ്യ മേഖലയിലെ ലോസ് ഗല്ലാർഡോസിന് സമീപമുള്ള ബിദാർ ഗ്രാമമാണ് കനത്ത നാശനഷ്ടങ്ങൾക്ക് സാക്ഷ്യം വഹിച്ചത്.
സൂര്യതാപത്തിന് സമാനമായ ചൂടിൽ വെന്തുരുകുന്ന സ്പെയിനിൽ, ഈ വർഷത്തെ രണ്ടാമത്തെ കഠിനമായ ഉഷ്ണതരംഗമാണ് കാട്ടുതീയുടെ തീവ്രത വർദ്ധിപ്പിച്ചത്. ഔദ്യോഗിക നിർദ്ദേശങ്ങൾ അവഗണിച്ച് രക്ഷപ്പെടാൻ ശ്രമിച്ചവരാണ് മരണപ്പെട്ടവരിൽ പലരും. തീ പടർന്നപ്പോൾ കാറുകളിലും മറ്റുമായി രക്ഷപ്പെടാൻ ശ്രമിച്ചവർ വഴിമധ്യേ തീയിൽ കുടുങ്ങുകയായിരുന്നു. വാഹനങ്ങൾക്കുള്ളിൽ വെന്തുമരിച്ച നിലയിലും പുറത്തിറങ്ങി നടന്നുപോകാൻ ശ്രമിക്കുന്നതിനിടെയുമാണ് മൃതദേഹങ്ങൾ കണ്ടെത്തിയത്. ഇവരിൽ ബ്രിട്ടീഷ് പൗരന്മാരും ഉൾപ്പെട്ടിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.
അൻഡാലൂഷ്യയിലെ അടിയന്തര വിഭാഗം മന്ത്രി അന്റോണിയോ സാൻസ് ഈ ദുരന്തത്തെ ‘അപൂർവ്വമായ ദുരന്തം’ എന്നാണ് വിശേഷിപ്പിച്ചത്. ഏകദേശം 150-ഓളം അഗ്നിശമന സേനാ അംഗങ്ങൾ തീ അണയ്ക്കാൻ രംഗത്തുണ്ട്. തകർന്നുവീണ ഒരു വൈദ്യുതി ലൈനിൽ നിന്നാകാം തീപ്പൊരി പടർന്നതെന്നാണ് പ്രാഥമിക നിഗമനം. എന്നാൽ ഔദ്യോഗിക സ്ഥിരീകരണം വരാനിരിക്കുന്നതേയുള്ളൂ.
സ്പെയിൻ പ്രധാനമന്ത്രി പെഡ്രോ സാഞ്ചസും, അൻഡാലൂഷ്യ റീജിയണൽ ഗവൺമെന്റ് തലവൻ ജുവാൻമ മൊറേനോയും ദുരന്തത്തിൽ അഗാധമായ ദുഃഖം രേഖപ്പെടുത്തി. “ഞങ്ങളുടെ ഹൃദയങ്ങൾ ഭാരപ്പെട്ടവയാണ്, ഈ വിയോഗത്തിൽ ഞങ്ങൾ അതീവ ദുഃഖിതരാണ്,” ജുവാൻമ മൊറേനോ എക്സ് പ്ലാറ്റ്ഫോമിലൂടെ പ്രതികരിച്ചു.
40 ഡിഗ്രി സെൽഷ്യസിന് മുകളിൽ താപനില തുടരുന്നതിനാൽ സ്പെയിനിലെ പല ഭാഗങ്ങളിലും ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. കാലാവസ്ഥാ വ്യതിയാനം മൂലമുണ്ടാകുന്ന ഇത്തരം ഉഷ്ണതരംഗങ്ങൾ വരും ദിവസങ്ങളിൽ കൂടുതൽ വെല്ലുവിളികൾ ഉയർത്തുമെന്ന ആശങ്കയിലാണ് അധികൃതർ. ദുരന്തബാധിത പ്രദേശങ്ങളിൽ നിന്ന് ആളുകളെ ഒഴിപ്പിക്കാനുള്ള നടപടികൾ തുടരുകയാണ്.
