തൃശൂര്: സില്വര് ലൈന് സര്വേയില് കല്ലിടാന് നിര്ദേശം നല്കിയത് റവന്യൂ വകുപ്പാണെന്ന കെ.റെയിലിന്റെ വിശദീകരണം തള്ളി റവന്യൂമന്ത്രി കെ.രാജന്.
കല്ലിടാന് റവന്യൂവകുപ്പ് നിര്ദേശം നല്കിയിട്ടില്ല. സാമൂഹിക ആഘാത പഠനമാണ് ഇപ്പോള് നടക്കുന്നത്. കല്ലിടുന്നത് റവന്യുവകുപ്പിന്റെ ജോലിയല്ല. ഒരു പദ്ധതിക്ക് ഭൂമി ഏറ്റെടുത്ത് നല്കണമെന്ന് ഒരു ഏജന്സി ആവശ്യപ്പെട്ടാല്, ആ ഭൂമി ഏറ്റെടുത്ത് നല്കാന് സര്ക്കാരിനു വേണ്ടി ഒരു സര്വീസ് ഏജന്സിയായാണ് റവന്യൂ വകുപ്പ് പ്രവര്ത്തിക്കുന്നത്. കല്ലിടാന് തീരുമാനമെടുത്ത് റവന്യൂവകുപ്പാണെന്ന് കെ.റെയിലിലെ ഏതെങ്കിലും ഉദ്യോഗസ്ഥന് പറഞ്ഞാല് അതിന് ചേരുന്ന മറുപടി റവന്യൂവകുപ്പിലെ ഉചിതമായ ഉദ്യോഗസ്ഥന് നല്കുമെന്നും കെ.രാജന് തൃശൂരില് മാധ്യമങ്ങളോട് പ്രതികരിച്ചു.
സംസ്ഥാന ദേശീയപാത വികസനത്തിനും ഗെയില് പൈപ്പ് ലൈനും വിജയകരമായ രീതിയില് ഭൂമി ഏറ്റെടുത്തുനല്കാന് റവന്യു വകുപ്പിന് കഴിട്ടുണ്ട്. ആളുകള്ക്ക് പരമാവധി ബുദ്ധിമുട്ട് കുറച്ച്, പരിസ്ഥിതിക്ക് ആഘാതമുണ്ടാകാതെയാണ് ഇത്തരം സ്ഥലമെടുപ്പുകള് നടത്തുന്നതെന്നും മന്ത്രി പറഞ്ഞു.
