ബലാത്സംഗ കേസില് പൊലീസ് തിരയുന്ന വ്ലോഗറും നടനുമായ ശ്രീകാന്ത് വെട്ടിയാറിന് മുന്കൂര് ജാമ്യം. ഹൈക്കോടതിയാണ് ശ്രീകാന്തിന് മുന്കൂര് ജാമ്യം അനുവദിച്ചത്.
പരാതി നല്കിയ യുവതിയും താനും സുഹൃത്തുക്കളായിരുന്നെന്നും ഗൂഢ ലക്ഷ്യത്തോടെയാണ് ലൈംഗികാരോപണം ഉന്നയിക്കുന്നതെന്നുമാണ് ശ്രീകാന്ത് വെട്ടിയാര് മുന്കൂര് ജാമ്യത്തിനായി സമര്പ്പിച്ച ഹരജിയില് പറഞ്ഞത്.
കൊച്ചിയിലെ ഫ്ലാറ്റില് വെച്ചും ഹോട്ടലില് വെച്ചും ശ്രീകാന്ത് വെട്ടിയാര് പീഡിപ്പിച്ചെന്നാണ് കേസ്. കഴിഞ്ഞ വര്ഷം ഫെബ്രുവരിയില് പിറന്നാള് ആഘോഷത്തിനിടെ ആലുവയിലെ ഫ്ലാറ്റില് വെച്ചും പിന്നീട് കൊച്ചിയിലെ ഹോട്ടല് മുറിയില് വെച്ചും ശ്രീകാന്ത് വെട്ടിയാര് പീഡിപ്പിച്ചെന്നാണ് യുവതിയുടെ പരാതി. വെട്ടിയാറിനെതിരെ ബലാത്സംഗ പരാതി നല്കിയ കൊല്ലം സ്വദേശിനിയായ യുവതിയുടെ രഹസ്യമൊഴി കോടതി രേഖപ്പെടുത്തിയിരുന്നു.
എറണാകുളം ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് കോടതിയാണ് പെണ്കുട്ടിയുടെ മൊഴിയെടുത്തത്. ശ്രീകാന്ത് വെട്ടിയാര് ഒളിവിലാണെന്നാണ് പൊലീസ് പറയുന്നത്. ആദ്യം ഫേസ്ബുക്കിലൂടെ താന് ആരാണെന്ന് പറയാതെയാണ് പരാതിക്കാരി ശ്രീകാന്ത് വെട്ടിയാര് തന്നെ പീഡിപ്പിച്ചെന്ന് വെളിപ്പെടുത്തിയത്. ‘വിമന് എഗെയ്ന്സ്റ്റ് സെക്ഷ്വല് ഹരാസ്മെന്റ്‘ എന്ന പേജ് വഴിയായിരുന്നു വെളിപ്പെടുത്തല്. പിന്നീട് നേരിട്ടെത്തി പൊലീസില് പരാതി നല്കുകയായിരുന്നു. മറ്റൊരു മീ ടൂ ആരോപണവും ശ്രീകാന്ത് വെട്ടിയാര്ക്കെതിരെ ഇതേ ഫേസ് ബുക്ക് പേജില് വന്നിട്ടുണ്ട്
