കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥര്ക്കെതിരായ വധഗൂഢാലോചന കേസില് നടന് ദിലീപ് അടക്കമുള്ള പ്രതികള് ആറ് ഫോണുകളും കോടതിയിലെത്തിച്ചു.
ദിലീപിന്റെ മൂന്ന് ഫോണുകള്, സഹോദരന്റെ അനൂപിന്റെ രണ്ട് ഫോണ്, സഹോദരി ഭര്ത്താവ് സൂരജിന്റെ ഒരു ഫോണ് എന്നിവയാണ് മുദ്രവെച്ച കവറില് രജിസ്ട്രാര്ക്ക് കൈമാറിയത്. നടിയെ ആക്രമിച്ച് ദൃശ്യങ്ങള് പകര്ത്തിയ കേസന്വേഷിച്ച ഉദ്യോഗസ്ഥനെ അപായപ്പെടുത്താന് ഗൂഢാലോചന നടത്തിയെന്ന കേസിലെ പ്രതികളായ നടന് ദിലീപ് അടക്കമുള്ളവരുടെ മൊബൈല് ഫോണുകള് തിങ്കളാഴ്ച 10.15-ന് മുന്പ് രജിസ്ട്രാര് ജനറലിന് കൈമാറണമെന്ന് ഹൈക്കോടതി ഉത്തരവിട്ടിരുന്നു. ഫോണുകള് കേരളത്തില് പരിശോധിക്കരുത് എന്നും, കേന്ദ്ര ഏജന്സികള് പരിശോധിക്കണമെന്നുമുള്ള ആവശ്യം ദീലിപ് നേരത്തെ ഉന്നയിച്ചിട്ടുണ്ട്. ഫോണില് അഭിഭാഷകരുമായി സംസാരിച്ചത് ഉള്പ്പെടെയുള്ള സംഭാഷണങ്ങളുണ്ട്. ഇത് പ്രിവിലേജ്ഡ് സംഭാഷണങ്ങളാണ് ഇവയെല്ലാം സംരക്ഷിക്കപ്പെടണമെന്ന വാദവും ദിലീപിന്റെ അഭിഭാഷകര് ഉയര്ത്തിയിരുന്നു.
ദിലീപിന്റെ മുന്കൂര് ജാമ്യാപേക്ഷയും പ്രോസിക്യൂഷന് നല്കിയ ഉപഹര്ജിയും കോടതി ഇന്ന് പരിഗണിക്കുന്നുണ്ട്. ജസ്റ്റിസ് പി ഗോപിനാഥാണ് കേസ് പരിഗണിക്കുന്നത്. അന്വേഷണവുമായി സഹകരിച്ചതിനാല് മുന്കൂര് ജാമ്യം അനുവദിക്കണമെന്ന വാദമാണ് ദിലീപ് കോടതിയില് ഉന്നയിക്കുക.
