കൊച്ചി: മുട്ടില് മരംമുറി കേസിലെ പ്രതികളുടെ മുന്കൂര് ജാമ്യാപേക്ഷ ഹൈക്കോടതി തള്ളി. പ്രതികളായ റോജി അഗസ്റ്റിന്, ആന്റോ അഗസ്റ്റിന്, ജോസ് കുട്ടി അഗസ്റ്റിന് എന്നിവര് നല്കിയ ജാമ്യാപേക്ഷയാണ് ഹൈക്കോടതി തള്ളിയത്.
പട്ടയ ഭൂമിയില് നിന്നാണ് തങ്ങള് മരം മുറിച്ചതെന്നും, റിസര്വ് വനമല്ലെന്നുമായിരുന്നു പ്രതികളുടെ വാദം. കൂടാതെ വനം വകുപ്പിന്റെയടക്കം അനുമതിയോടെയാണ് മരങ്ങള് മുറിച്ചതെന്നും പ്രതികള് കോടതിയെ അറിയിച്ചിരുന്നു.
എന്നാല് റിസര്വ് മരങ്ങള് തന്നെയാണ് പ്രതികള് മുറിച്ചതെന്നും, കോടിക്കണക്കിന് രൂപയുടെ വനംകൊള്ള നടന്നിട്ടുണ്ടെന്നുമാണ് സര്ക്കാരിന്റെ വാദം. പ്രതികളെ കസ്റ്റഡിയില് ചോദ്യം ചെയ്യേണ്ടതിനാല് മുന്കൂര് ജാമ്യം നല്കരുതെന്നും സര്ക്കാര് ആവശ്യപ്പെട്ടിരുന്നു. മരം മുറിച്ചു കടത്താന് അനുമതി നല്കിയ ഉദ്യോഗസ്ഥനെതിരെ സര്ക്കാര് എന്ത് നടപടിയെടുത്തുവെന്ന് കോടതി ചോദിച്ചു.
