തിരുവനന്തപുരം: സംസ്ഥാനത്ത് ലോക്ഡൗണില് ഇളവുകള് അനുവദിക്കുന്നത് സംബന്ധിച്ച തീരുമാനം ഇന്നുണ്ടാകും. മുഖ്യമന്ത്രി പിണറായി വിജയന്റെ അധ്യക്ഷതയില് ചേരുന്ന അവലോകന യോഗത്തിലായിരിക്കും തീരുമാനമെടുക്കുക.
ഇളവുകളോടെ ലോക്ഡൗണ് തുടരുമെന്നാണ് വിവരം. സംസ്ഥാനത്ത് ലോക്ഡൗണ് പ്രഖ്യാപിച്ചിരുന്ന ജൂണ് 16ന് (ബുധനാഴ്ച) ശേഷമായിരിക്കും ഇളവുകള് അനുവദിക്കുക.
പൊതു ഗതാഗതം ആവശ്യത്തിന് മാത്രം അനുവദിച്ചും കൂടുതല് കടകളും സ്ഥാപനങ്ങളും പ്രവര്ത്തിക്കാന് അനുമതി നല്കിയുമായിരിക്കും ആദ്യ ഘട്ട ഇളവുകള്.
കോവിഡിന്റെ മൂന്നാംതരംഗ വ്യാപന സാധ്യത നിലനില്ക്കുന്നതിനാല് ആള്ക്കൂട്ടം ഒഴിവാക്കാനുള്ള നിയന്ത്രണങ്ങള് തുടര്ന്നേക്കും.
അതേസമയം ലോക്ഡൗണ് പൂര്ണമായും ഒഴിവാക്കാന് കഴിയില്ലെന്ന് ആരോഗ്യമന്ത്രി വീണ ജോര്ജ് പറഞ്ഞു. ചില ജില്ലകളില് പോസിറ്റിവിറ്റി നിരക്ക് കുറയുന്നില്ല. മരണനിരക്കും ഉയര്ന്നുനില്ക്കുന്നു. ഈ സാഹചര്യത്തില് ലോക്ഡൗണില് പൂര്ണമായും ഇളവ് നല്കാനാകില്ലെന്നും ആരോഗ്യമന്ത്രി കൂട്ടിച്ചേര്ത്തു. വാക്സിന് എല്ലാവര്ക്കും എത്തിക്കാനാണ് ശ്രമമെന്നും ആരോഗ്യമന്ത്രി കൂട്ടിച്ചേര്ത്തു.
നിലവില് 25 ശതമാനത്തിന് ഒരു ഡോസ് വാക്സിന് നല്കിയിട്ടുണ്ട്. 75 ശതമാനം ജനങ്ങളും കോവിഡ് വാക്സിന് സ്വീകരിച്ചാല് മാത്രമേ സംസ്ഥാനം കോവിഡില്നിന്ന് മുക്തമായിയെന്ന് പറയാനാകൂവെന്നുമാണ് ആരോഗ്യവകുപ്പിന്റെ വിലയിരുത്തല്.
