18കൊച്ചി: നടന് മോഹന്ലാല് പ്രതിയായ ആനക്കൊന്പ് കേസ് പിന്വലിക്കാനൊരുങ്ങി സംസ്ഥാന സര്ക്കാര്. മോഹന്ലാലിന്റെ അപേക്ഷയെ തുടര്ന്നാണ് നടപടി. പെരുന്പാവൂര് മജിസ്ട്രേറ്റ് കോടതിയിലെ കേസാണ് സര്ക്കാര് പിന്വലിക്കാന് തീരുമാനിച്ചിരിക്കുന്നത്. ഡിജിപിയുടെ (ഡയറക്ടര് ജനറല് ഓഫ് പ്രോസിക്യൂഷന്) നിയമോപദേശത്തിന്റെ അടിസ്ഥാനത്തില് കേസ് പിന്വലിക്കുന്ന കാര്യത്തില് അന്തിമ തീരുമാനമെടുക്കും.
വന്യജീവി സംരക്ഷണ നിയമപ്രകാരം എടുത്ത കേസ് പിന്വലിക്കണമെന്ന് ആവശ്യപ്പെട്ട് മോഹന്ലാല് 2016 ജനുവരിയിലും 2019 സെപ്റ്റംബറിലും സര്ക്കാരിന് അപേക്ഷ നല്കിയിരുന്നു. തുടര്ന്ന് സര്ക്കാര് 2019 ഡിസംബര് നാലിന് ഡിജിപിയോട് നിയമോപദേശവും തേടി. കേസ് പിന്വലിക്കാമെന്ന് ഡിജിപി നിയമോപദേശം നല്കി.
ഇതിന്റെ അടിസ്ഥാനത്തിലാണ് പെരുന്പാവൂര് മജിസ്ട്രേറ്റ് കോടതിയിലെ കേസ് പിന്വലിക്കുന്നതിന് സര്ക്കാരിന് എതിര്പ്പില്ലെന്ന് കാണിച്ചുകൊണ്ട് ജില്ലാ കളക്ടര്ക്ക് ഈ മാസം ഏഴിന് അഡീഷ്ണല് ചീഫ് സെക്രട്ടറി കത്തയച്ചത്.
2012 ജൂണില് ആദായനികുതി വിഭാഗം മോഹന്ലാലിന്റെ തേവരയിലുള്ള വീട്ടില് നടത്തിയ റെയ്ഡിലായിരുന്നു ആനക്കൊന്പുകള് കണ്ടെത്തിയത്. ആനക്കൊന്പ് കൈവശം വച്ചത് കുറ്റകരവും ശിക്ഷാര്ഹവുമാണെന്ന് വനംവകുപ്പ് സമര്പ്പിച്ച കുറ്റപത്രത്തില് വ്യക്തമായിരുന്നു.
