കൊച്ചി: നടിയെ ആക്രമിച്ച കേസിലെ പ്രതിപ്പട്ടികയില് നിന്ന് തന്നെ ഒഴിവാക്കണമെന്ന് കാണിച്ച് നടന് ദിലീപ് സമര്പ്പിച്ച വിടുതല് ഹര്ജി കോടതി തള്ളി. കേസിലെ പത്താം പ്രതിയായ വിഷ്ണു സമര്പ്പിച്ച വിടുതല് ഹര്ജിയും കോടതി തള്ളി. കൊച്ചിയിലെ വിചാരണ കോടതിയാണ് ഇരുവരുടെയും ഹര്ജി തള്ളിയത്. നിലവിലുള്ള കുറ്റപത്രത്തില് തന്നെ വിചാരണ ചെയ്യാനുള്ള തെളിവില്ലെന്നായിരുന്നു ദിലീപിന്റെ വാദം. ഇതാണ് ഇപ്പോള് കോടതി തള്ളിയിരിക്കുന്നത്.
അതേസമയം ദിലീപിനെ പ്രതിപ്പട്ടികയില് നിന്ന് ഒഴിവാക്കരുതെന്നും വിചാരണ നടത്താന് പര്യാപ്തമായ തെളിവുകള് ഉണ്ടെന്നുമാണ് പ്രോസിക്യൂഷന് കോടതിയെ അറിയിച്ചത്. ദിലീപിന്റെ ഹര്ജിയില് നടിയുടെ സ്വകാര്യതയെ ബാധിക്കുന്ന പരാമര്ശങ്ങള് ഉള്ളതിനാല് അടച്ചിട്ട കോടതി മുറിയിലാണ് വാദം പൂര്ത്തിയാക്കിയത്.
നിലവില് ഈ കേസില് പത്ത് പേരാണ് പ്രതിപ്പട്ടികയിലുള്ളത്. പള്സര് സുനി, മാര്ട്ടിന് ആന്റണി, മണികണ്ഠന്, വിജേഷ്, സലിം, പ്രദീപ്, ചാര്ളി തോമസ്, നടന് ദിലീപ്, സനല്കുമാര്, വിഷ്ണു എന്നിവരാണ് പ്രതികള്. പതിനൊന്നും പന്ത്രണ്ടും പ്രതികളായിരുന്ന അഭിഭാഷകരായ പ്രതിഷ് ചാക്കോ, രാജു ജോസഫ് എന്നിവരെ ഹൈക്കോടതി നേരത്തെ പ്രതി പട്ടികയില് നിന്ന് ഒഴിവാക്കിയിരുന്നു.