ഫുട്ബോൾ ഇതിഹാസം ലയണൽ മെസിയെയും അർജന്റീന ടീമിനെയും കേരളത്തിൽ എത്തിക്കുമെന്ന മുൻ സർക്കാരിന്റെ പ്രഖ്യാപനവുമായി ബന്ധപ്പെട്ട വിവാദങ്ങൾ ഇന്ന് (ബുധനാഴ്ച) ചേരുന്ന മന്ത്രിസഭാ യോഗത്തിൽ നിർണായക ചർച്ചയാകും. വിഷയം സംബന്ധിച്ച് മുൻ കായിക മന്ത്രി വി. അബ്ദുറഹിമാന്റെ കാലത്തെ ഇടപാടുകളിൽ ഔദ്യോഗിക അന്വേഷണം പ്രഖ്യാപിക്കാൻ സാധ്യതയുണ്ടെന്നാണ് ലഭിക്കുന്ന സൂചനകൾ.
മുൻ മന്ത്രി വി. അബ്ദുറഹിമാന്റെ നേതൃത്വത്തിൽ നടന്ന പ്രവർത്തനങ്ങളും സ്പോൺസർഷിപ്പ് ഇടപാടുകളും ചട്ടവിരുദ്ധമായിരുന്നുവെന്ന് കായിക വകുപ്പ് സ്പെഷ്യൽ സെക്രട്ടറിയുടെ അന്വേഷണ റിപ്പോർട്ടിൽ വ്യക്തമാക്കുന്നു. ഫിഫയുടെയോ അഖിലേന്ത്യ ഫുട്ബോൾ ഫെഡറേഷന്റെയോ (AIFF) കൃത്യമായ അനുമതികളോ ഔദ്യോഗിക കരാറുകളോ ഇല്ലാതെയാണ് നടപടികൾ മുന്നോട്ട് കൊണ്ടുപോയത്.
സർക്കാരിന് നേരിട്ട് സാമ്പത്തിക നഷ്ടമുണ്ടായിട്ടില്ലെന്ന മുൻ മന്ത്രിയുടെ വാദങ്ങളെ നിലവിലെ കായിക മന്ത്രി ഒ.ജെ. ജനീഷ് പൂർണ്ണമായും തള്ളിക്കളഞ്ഞു. സർക്കാർ സംവിധാനങ്ങൾ ദുരുപയോഗം ചെയ്ത് സ്വകാര്യ വ്യക്തികൾക്കും കമ്പനികൾക്കും അനധികൃതമായി വാണിജ്യ ലാഭമുണ്ടാക്കിക്കൊടുക്കാനാണ് ഈ നീക്കം ലക്ഷ്യമിട്ടതെന്നാണ് പുതിയ കണ്ടെത്തൽ. കൊച്ചി കലൂർ സ്റ്റേഡിയം അനുമതി നൽകിയതിലും ഫണ്ട് കൈമാറ്റത്തിലും വ്യാപകമായ ചട്ടലംഘനങ്ങൾ നടന്നിട്ടുണ്ടെന്നും റിപ്പോർട്ടിൽ ചൂണ്ടിക്കാണിക്കുന്നുണ്ട്.
മെസിയുടെ വരവ് സംബന്ധിച്ച് ലക്ഷക്കണക്കിന് ഫുട്ബോൾ ആരാധകരെ തെറ്റിധരിപ്പിക്കുന്ന രീതിയിൽ വ്യാജ അവകാശവാദങ്ങൾ ഉന്നയിച്ചതിൽ വലിയ ദുരൂഹതയുണ്ടെന്ന് കായിക മന്ത്രി ഒ.ജെ. ജനീഷ് വ്യക്തമാക്കി. ഈ പശ്ചാത്തലത്തിൽ, ഇടപാടുകളുടെ മുഴുവൻ സ്രോതസ്സും കേന്ദ്ര ഏജൻസികളുടെ സഹായത്തോടെ സമഗ്രമായ അന്വേഷണത്തിന് വിധേയമാക്കാനാണ് സർക്കാർ ആലോചിക്കുന്നത്. ഫുട്ബോൾ പ്രേമികൾക്കിടയിൽ വലിയ ചർച്ചയായ ഈ വിഷയത്തിൽ മന്ത്രിസഭ ഇന്ന് എടുക്കുന്ന നിർണ്ണായക തീരുമാനം എന്തായിരിക്കുമെന്ന ആകാംക്ഷയിലാണ് കായിക ലോകം.
