2026-ലെ ഫിഫ ലോകകപ്പ് ഫൈനൽ മത്സരത്തിന് ശേഷം ചരിത്രപ്രധാനമായ തീരുമാനവുമായി സ്ലൊവേനിയൻ റഫറി സ്ലാവ്കോ വിൻസിച്ച് അന്താരാഷ്ട്ര ഫുട്ബോളിൽ നിന്ന് വിരമിച്ചു. ഫുട്ബോൾ ചരിത്രത്തിലെ ഏറ്റവും ശ്രദ്ധേയമായ കരിയറുകളിലൊന്നിനാണ് ഇതോടെ ഔദ്യോഗികമായി തിരശീല വീണിരിക്കുന്നത്.
ലോകകപ്പ് ഫൈനലിൽ സ്പെയിൻ – അർജന്റീന പോരാട്ടം നിയന്ത്രിച്ചുകൊണ്ടാണ് 46 കാരനായ വിൻസിച്ച് തന്റെ മാതൃരാജ്യമായ സ്ലൊവേനിയയിൽ നിന്നും കരിയറിന് വിരാമമിട്ടത്. സ്ളൊവേനിയയിൽ നിന്ന് ലോകകപ്പ് ഫൈനൽ നിയന്ത്രിക്കുന്ന ആദ്യ റഫറി എന്ന റെക്കോർഡും അദ്ദേഹത്തിന്റെ പേരിലാണ്. ഫൈനൽ മത്സരത്തിലെ ചില തർക്കങ്ങളും കടുത്ത തീരുമാനങ്ങളും വിമർശനങ്ങൾക്ക് വഴിവെച്ചിരുന്നെങ്കിലും, ആഗോളതലത്തിൽ വലിയ ആദരവുകളോടെയാണ് അദ്ദേഹത്തിന്റെ പടിയിറക്കം.
2007-ൽ സ്ലൊവേനിയൻ ടോപ് ലീഗിലൂടെയും, തുടർന്ന് 2010-ൽ ഫിഫ ബാഡ്ജിലൂടെയും രാജ്യാന്തര റഫറിയിങ് രംഗത്തേക്ക് കടന്നുവന്ന അദ്ദേഹം, യൂറോപ്യൻ ഫുട്ബോളിലെ ഏറ്റവും വിശ്വസ്തരായ മാച്ച് ഒഫീഷ്യലുകളിൽ ഒരാളായിട്ടാണ് അറിയപ്പെട്ടിരുന്നത്. 2022-ലെ ഖത്തർ ലോകകപ്പിലും, 2024-ലെ യുവേഫ ചാമ്പ്യൻസ് ലീഗ് ഫൈനലിലും റഫറിയായി പ്രവർത്തിച്ച അദ്ദേഹം തന്റെ മികവ് തെളിയിച്ചിരുന്നു.
കരിയറിന്റെ അവസാനത്തിൽ ഇന്റർനാഷണൽ ഫെഡറേഷൻ ഓഫ് ഫുട്ബോൾ ഹിസ്റ്ററി ആൻഡ് സ്റ്റാറ്റിസ്റ്റിക്സിന്റെ ലോകകപ്പിലെ മികച്ച റഫറിക്കുള്ള പുരസ്കാരവും, ഇറ്റലിയുടെ പ്രശസ്തമായ ഗ്യൂലിയോ കാമ്പനാറ്റി അവാർഡും അദ്ദേഹത്തെ തേടിയെത്തിയിരുന്നു. ഫുട്ബോളിന്റെ ഏറ്റവും വലിയ പോരാട്ടം നിയന്ത്രിച്ചുകൊണ്ട് കരിയർ അവസാനിപ്പിക്കാൻ കഴിഞ്ഞത് ഒരു റഫറിയെ സംബന്ധിച്ചിടത്തോളം ഏറ്റവും വലിയ സ്വപ്ന സാക്ഷാത്കാരമാണെന്ന് സ്ലൊവേനിയൻ ഫുട്ബോൾ അസോസിയേഷൻ പുറത്തിറക്കിയ പ്രസ്താവനയിൽ വ്യക്തമാക്കുന്നു.
