ബംഗാള് ഉള്ക്കടലില് രൂപംകൊണ്ട ന്യൂനമര്ദത്തിന്റെ സ്വാധീനഫലമായി കേരളത്തില് മഴ വീണ്ടും ശക്തമാകുന്നു. കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ് അനുസരിച്ച് സംസ്ഥാനത്ത് ജൂലൈ 31 വരെ വിവിധ ജില്ലകളില് മഴ തുടരുമെന്നാണ് ഔദ്യോഗിക റിപ്പോര്ട്ടുകള് വ്യക്തമാക്കുന്നത്. പ്രതികൂല കാലാവസ്ഥ തുടരുന്ന പശ്ചാത്തലത്തില് സംസ്ഥാനത്തിന്റെ വിവിധ ഭാഗങ്ങളില് അതീവ ജാഗ്രത പ്രഖ്യാപിച്ചിട്ടുണ്ട്.
കോട്ടയം, എറണാകുളം, മലപ്പുറം, കോഴിക്കോട്, വയനാട്, കണ്ണൂർ, കാസർകോട് തുടങ്ങിയ ഏഴ് ജില്ലകളിലാണ് കേന്ദ്ര കാലാവസ്ഥാവകുപ്പ് യെല്ലോ അലർട്ട് പ്രഖ്യാപിച്ചിരിക്കുന്നത്. ഒറ്റപ്പെട്ടയിടങ്ങളില് ശക്തമായ മഴയ്ക്കും ശക്തമായ കാറ്റിനും ഇടിമിന്നലോടുകൂടിയ കാലാവസ്ഥയ്ക്കും സാധ്യതയുണ്ടെന്ന് അധികൃതര് മുന്നറിയിപ്പ് നല്കുന്നു. തീരദേശവാസികളും മലയോര മേഖലകളില് താമസിക്കുന്നവരും പ്രത്യേക ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റിയും വ്യക്തമാക്കിയിട്ടുണ്ട്. ജനങ്ങളുടെ സുരക്ഷ ഉറപ്പാക്കുന്നതിന്റെ ഭാഗമായി വിവിധ വകുപ്പുകളുടെ നേതൃത്വത്തില് മുന്കരുതല് നടപടികള് ഊര്ജിതമാക്കിയിട്ടുണ്ട്.
മഴ ശക്തമാകുന്ന സാഹചര്യത്തില് റോഡുകളില് വെള്ളക്കെട്ട് രൂപപ്പെടാനും ഗതാഗത തടസ്സങ്ങള് ഉണ്ടാകാനും സാധ്യതയുണ്ട്. കൂടാതെ, താഴ്ന്ന പ്രദേശങ്ങളില് വെള്ളം കയറാനും മലയോര മേഖലകളില് മണ്ണിടിച്ചിലിനുള്ള സാധ്യത ഉള്ളതിനാല് പൊതുജനങ്ങള് ജാഗ്രത പാലിക്കണമെന്ന് നിര്ദ്ദേശിച്ചിട്ടുണ്ട്. അത്യാവശ്യ ഘട്ടങ്ങളില് മാത്രം യാത്രകള് നടത്തുക. ശക്തമായ കാറ്റിനും ഇടിമിന്നലിനും സാധ്യതയുള്ളതിനാല് തുറസ്സായ സ്ഥലങ്ങളില് നില്ക്കുന്നവര് സുരക്ഷിത സ്ഥാനങ്ങളിലേക്ക് മാറേണ്ടതാണ്. കടലില് മോശം കാലാവസ്ഥയ്ക്ക് സാധ്യതയുള്ളതിനാല് മല്സ്യത്തൊഴിലാളികള് കടലില് പോകരുതെന്നും കര്ശനമായ നിര്ദ്ദേശമുണ്ട്. ജൂലൈ 31 വരെ മഴ തുടരുന്നതിനാല് കാലാവസ്ഥാ വകുപ്പിന്റെയും ജില്ലാ ഭരണകൂടത്തിന്റെയും ഔദ്യോഗിക അറിയിപ്പുകള് നിരന്തരം ശ്രദ്ധിക്കാന് ജനങ്ങളോട് അഭ്യർത്ഥിക്കുന്നു.
