പട്ടാമ്പിയിൽ ഓടിക്കൊണ്ടിരുന്ന കെഎസ്ആർടിസി ബസിന് തീപിടിച്ചുണ്ടായ അപകടത്തിൽ നിന്ന് യാത്രക്കാർ അത്ഭുതകരമായി രക്ഷപ്പെട്ടു. ഇന്ന് പുലർച്ചെ 4.30ഓടെ പട്ടാമ്പി – പെരിന്തൽമണ്ണ റോഡിൽ പുതിയ ഫിഷ് മാർക്കറ്റിന് സമീപമായിരുന്നു നാടിനെ മുൾമുനയിലാക്കിയ സംഭവം. പെരിന്തൽമണ്ണയിൽ നിന്ന് കോട്ടയത്തേക്ക് പോകുകയായിരുന്ന സൂപ്പർ ക്ലാസ് ബസിലാണ് തീപിടിത്തമുണ്ടായത്.
യാത്രക്കാർ ഉറക്കത്തിൽ ആണ്ടുനിൽക്കുന്ന പുലർച്ചെയുള്ള സമയത്ത് ബസിന്റെ മുൻഭാഗത്തുനിന്ന് തീയും പുകയും ഉയരുന്നത് ഡ്രൈവറുടെ ശ്രദ്ധയിൽ പെടുകയായിരുന്നു. അപകടത്തിന്റെ ഭീകരത മനസിലാക്കിയ ഡ്രൈവർ ഒട്ടും സമയം കളയാതെ റോഡരികിൽ വാഹനം നിർത്തി യാത്രക്കാരോട് ഉടൻ തന്നെ പുറത്തിറങ്ങാൻ ആവശ്യപ്പെടുകയായിരുന്നു. ജീവനക്കാരുടെ ഈ സമയോചിതവും ജാഗ്രതയോടെയുമുള്ള ഇടപെടൽ മൂലം വൻ ദുരന്തമാണ് ഒഴിവായത്. ബസിൽ ഉണ്ടായിരുന്ന മുഴുവൻ യാത്രക്കാരും യാതൊരു പരിക്കുകളുമില്ലാതെ അത്ഭുതകരമായി രക്ഷപ്പെടുകയായിരുന്നു.
ഷോർട്ട് സർക്യൂട്ടാണ് തീപിടിത്തത്തിന് കാരമെന്നാണ് പ്രാഥമിക നിഗമനം. ബസിന്റെ മുൻഭാഗം പൂർണ്ണമായും കത്തിനശിച്ചിട്ടുണ്ട്. തീ പടരുന്നത് കണ്ട് മാർക്കറ്റിലുണ്ടായിരുന്ന തൊഴിലാളികളും നാട്ടുകാരും ചേർന്ന് വെള്ളമൊഴിച്ച് തീയണയ്ക്കാൻ പ്രാഥമിക ശ്രമങ്ങൾ നടത്തിയിരുന്നു. തുടർന്ന് വിവരമറിഞ്ഞ് സ്ഥലത്തെത്തിയ പട്ടാമ്പി ഫയർഫോഴ്സും പോലീസും ചേർന്ന് തീ പൂർണ്ണമായി അണച്ചു.
അപകടത്തെ തുടർന്ന് പട്ടാമ്പി-പെരിന്തൽമണ്ണ റൂട്ടിൽ ഏറെ നേരം ഗതാഗതം തടസ്സപ്പെട്ടിരുന്നു. സംഭവത്തിൽ കെഎസ്ആർടിസിയുടെ വകുപ്പുതല അന്വേഷണവും പോലീസിന്റെ ഔദ്യോഗിക അന്വേഷണവും ആരംഭിച്ചിട്ടുണ്ട്. ബസിന്റെ കാലപ്പഴക്കത്തെക്കുറിച്ചും സാങ്കേതിക തകരാറുകളെക്കുറിച്ചും വിശദമായ പരിശോധന നടത്തിവരികയാണെന്ന് അധികൃതർ അറിയിച്ചു.
