സംസ്ഥാനത്ത് സ്വർണവിലയിൽ വീണ്ടും വൻ വർധനവ് രേഖപ്പെടുത്തിയിരിക്കുന്നു. കഴിഞ്ഞ കുറേ ദിവസങ്ങളായി വിപണിയിൽ ഇടിവ് നേരിട്ടിരുന്ന സ്വർണവില, ഇന്ന് വീണ്ടും ഉയർന്നു. ഇന്നലെ രാവിലെയും വിപണിയിൽ വലിയ രീതിയിലുള്ള വിലക്കയറ്റം ഉണ്ടായിരുന്നു. തുടർച്ചയായ ഈ ദിവസങ്ങളിലെ മാറ്റങ്ങൾ സാധാരണക്കാരായ സ്വർണാഭരണ പ്രേമികളെയും വ്യാപാരികളെയും ഒരുപോലെ ആശങ്കയിലാഴ്ത്തിയിരിക്കുകയാണ്.ഇന്ന് 22 കാരറ്റ് ഒരു ഗ്രാം സ്വർണത്തിന് 120 രൂപയാണ് വർധിച്ചിരിക്കുന്നത്. പവനിൽ കണക്കാക്കുമ്പോൾ 960 രൂപയുടെ വർധനവാണ് ഉണ്ടായിട്ടുള്ളത്. ഇതോടെ ഇന്ന് സംസ്ഥാനത്ത് 22 കാരറ്റ് ഒരു ഗ്രാം സ്വർണത്തിന് 14,360 രൂപയും, ഒരു പവന് 1,14,880 രൂപയുമായി ഉയർന്നു.
ഇന്നലെ രാവിലെ സ്വർണവിലയിൽ ഒറ്റയടിക്ക് 2,440 രൂപയുടെ വൻ കുതിച്ചുചാട്ടമാണ് രേഖപ്പെടുത്തിയത്. ഇത്തരത്തിൽ വെറും 48 മണിക്കൂറിനുള്ളിൽ മാത്രം സ്വർണവിലയിൽ ആകെ 3,400 രൂപയോളമാണ് വർധിച്ചിരിക്കുന്നത്. കഴിഞ്ഞ ദിവസങ്ങളിൽ വില കുറഞ്ഞു നിന്ന അവസരങ്ങൾ മാറി, പെട്ടെന്നുണ്ടായ ഈ തിരിച്ചുകയറ്റം വിപണിയെ വീണ്ടും സജീവമാക്കിയിട്ടുണ്ടെങ്കിലും വിവാഹ ആവശ്യങ്ങൾക്കായി സ്വർണം വാങ്ങാനിരിക്കുന്ന സാധാരണക്കാരെ സംബന്ധിച്ചിത് വലിയൊരു തിരിച്ചടിയാണ്.
ആഗോള വിപണിയിലെ സ്വർണ വിലയിലുള്ള ഏറ്റക്കുറച്ചിലുകളും സാമ്പത്തിക രംഗത്തെ മാറ്റങ്ങളുമാണ് സംസ്ഥാനത്തെ സ്വർണവിലയിലും നേരിട്ട് പ്രതിഫലിക്കുന്നത്. ആഗോളതലത്തിൽ സ്വർണത്തോടുള്ള താൽപ്പര്യവും കറൻസി മൂല്യത്തിലുണ്ടാകുന്ന വ്യതിയാനങ്ങളും വിലയെ സ്വാധീനിക്കുന്നുണ്ടെന്നാണ് വിപണി വിദഗ്ധരുടെ വിലയിരുത്തൽ. വരും ദിവസങ്ങളിലും വിപണിയിൽ ഈ അസ്ഥിരത തുടരാനാണ് സാധ്യതയെന്നാണ് സൂചനകൾ നൽകുന്നത്.
