വിദേശ സംഭാവന നിയന്ത്രണ നിയമമായ FCRA (Foreign Contribution (Regulation) Act) ഭേദഗതി ബില്ലിലെ വിവാദ വ്യവസ്ഥകൾ ഒഴിവാക്കാൻ കേന്ദ്ര സർക്കാർ നീക്കം നടത്തുന്നതായി റിപ്പോർട്ട്. യു.എസ് കോൺഗ്രസ് അംഗം റിലി മൂർ അടക്കമുള്ള പ്രമുഖർ വിദേശ ഫണ്ടിംഗ് നിയമത്തിനെതിരെ ആശങ്ക പ്രകടിപ്പിച്ച പശ്ചാത്തലത്തിലാണ് ഈ നിർണായക നീക്കം. രാജ്യത്തെ എൻ.ജി.ഒകൾ, ആരാധനാലയങ്ങൾ, സന്നദ്ധ സംഘടനകൾ എന്നിവയുടെ നടത്തിപ്പിനെയും സ്വത്തുക്കളെയും ബാധിക്കുന്ന കർശന നിർദേശങ്ങളാണ് ബില്ലിൽ ഉൾപ്പെടുത്തിയിരുന്നത്.
എഫ്.സി.ആർ.എ രജിസ്ട്രേഷൻ റദ്ദാക്കപ്പെടുകയോ പുതുക്കാതെ കിടക്കുകയോ ചെയ്യുന്ന സംഘടനകളുടെ ആസ്തികൾ പ്രത്യേക ‘ഡെസിഗ്നേറ്റഡ് അതോറിറ്റി’യുടെ നിയന്ത്രണത്തിലാക്കുമെന്നതായിരുന്നു ബില്ലിലെ പ്രധാന വ്യവസ്ഥ. ഇത് രാജ്യത്തുടനീളമുള്ള ക്രൈസ്തവ മിഷണറി സംഘടനകളുടെയും ചാരിറ്റബിൾ ട്രസ്റ്റുകളുടെയും പ്രവർത്തനങ്ങളെ സാരമായി ബാധിക്കുമെന്ന ആക്ഷേപം ശക്തമായിരുന്നു. പ്രത്യേകിച്ച് കേരളത്തിലെ വിവിധ വിദ്യാഭ്യാസ-ആരോഗ്യ സ്ഥാപനങ്ങളെ ഇത് പ്രതികൂലമായി ബാധിക്കുമെന്ന ആശങ്ക വ്യാപകമായി ഉയർന്നിരുന്നു.
ഇതേത്തുടർന്ന് യു.എസ് കോൺഗ്രസ് അംഗം റിലി മൂർ ഉൾപ്പെടെയുള്ളവർ ബില്ലിനെതിരെ പരസ്യമായി രംഗത്തുവരികയും, ഇത് ഇന്ത്യ-അമേരിക്ക ബന്ധത്തെ ബാധിക്കാമെന്ന് മുന്നറിയിപ്പ് നൽകുകയും ചെയ്തിരുന്നു. നിലവിലുള്ള നിയമത്തിലെ കർശന വ്യവസ്ഥകൾ സംഘടനകളുടെ പ്രവർത്തന സ്വാതന്ത്ര്യത്തെ ഹനിക്കുന്നു എന്ന വിമർശനവും ശക്തമാണ്. ഈ പശ്ചാത്തലത്തിലാണ് ബില്ലിലെ അതൃപ്തി ഉണ്ടാക്കുന്ന വിവാദ നിർദേശങ്ങൾ ലഘൂകരിക്കാനോ ഒഴിവാക്കാനോ ഉള്ള ആലോചനകൾ പാർലമെന്റിൽ നടക്കുന്നത്.
സുതാര്യത ഉറപ്പാക്കാനാണ് ഭേദഗതികളിലൂടെ ലക്ഷ്യമിടുന്നതെന്നാണ് കേന്ദ്ര സർക്കാരിന്റെ ഔദ്യോഗിക നിലപാട്. എങ്കിലും സന്നദ്ധ സംഘടനകളുടെയും ആരാധനാലയങ്ങളുടെയും സ്വത്തുക്കൾ ഏറ്റെടുക്കുന്നതുൾപ്പെടെയുള്ള കർശനമായ വ്യവസ്ഥകളിൽ സമവായമുണ്ടാക്കാനാണ് സർക്കാരിന്റെ പുതിയ നീക്കം. പാർലമെന്റിന്റെ നടപ്പു സമ്മേളനത്തിൽ ബിൽ വീണ്ടും പരിഗണനയ്ക്ക് വരുമ്പോൾ അതിൽ ഭേദഗതികൾ ഉണ്ടാകുമെന്നാണ് സൂചന.
